چیئرمین سینیٹ محمد صادق سنجرانی تون ضلع چاغی نا سرکڑدہ و ورناتا ڈل انا اوڑدہی

اسلام آباد۔01 مارچ (اے پی پی) چیئرمین سینیٹ محمد صادق سنجرانی ورناتے کسبکاری و کسبی تعلیم آ چکار کننگ نا گرج آ زور شاغسا پارینے کہ ورناک ملک انا آخبت آک ءُ و تینا غٹ تر لائخی تے تخلیقی سرجزآتیا تخر۔ داخیال آتا درشانی ءِ او ضلع چاغی نا ورنا و سرکڑدہ غاتا ڈل اتون چارشنبے نادے آ پارلیمنٹ ہاؤس اٹی اوڑدہی ٹی کرے۔ اوڑدہی ٹی بلوچستان و خاص وڑاٹ ضلع چاغی نا ویل و شونداری نا بابت امور تیا گپ وتران کننگا۔ چیئرمین سینیٹ محمد صادق سنجرانی ورناتے کسبکاری و کسبی تعلیم آ چکار کننگ نا گرج آ زور شاغا۔ چیئرمین سینیٹ پارے کہ ورناک ملک انا آخبت آک ءُ، و اوفتے غٹ تر لائخی تے تخلیقی سرجزآتیا کننگ نا گرج ءِ تانکہ ملک انا جم زرگزرانی و راجی شونداری ٹی پبی کڑد ادا کننگ مرے۔ اوپارے کہ انسانی لائخی تا سوب آن قومک شون ہلکنو و اینو ننے اونا سخت گرج ءِ۔ چیئرمین سینیٹ پارے کہ شونداری و ہدف آتا دوئی کننگ اٹ کسبکار بندغ آتا اہم ءُ کڑد اس مریک، بلوچستان نا ورناتیٹی لائخی نا کمتی اف و اوفتا لائخی تے مون آ اتنگ کن چندی ڈٹ آتیا کاریم مننگ ءِ، گوادر بندرگاہ صوبہ بلوچستان نا تقدید ءِ بدل کننگ نا لائخی تخک۔ ڈل چاغی ٹی ہندی آبادی ءِ مون تروک ویل آتے مون آتخا و چیئرمین سینیٹ اوفتے باور کرفے کہ ویل آتا ایسری کن تعلقدار فورم آتون رابطہ کننگک۔ چیئرمین سینیٹ ڈل ءِ سینیٹ نا گولڈن جوبلی و چنکا صوبہ غاتے مون تروک ویل آتا ایسری ٹی پارلیمنٹ نا سینیٹ نا کڑد انا بارواٹی معلومدار کرے۔ بشخ ہلوک آک بلوچستان نا شونداری و اونا الس نا راجی آسراتی کن اواری اٹ کاریم کننگ نا عزم انا درشانی ءِ کریر۔ چیئرمین سینیٹ پارے کہ سینیٹ صوبہ غاتے مون تروک ویل آتے ایسر کننگ و تینا شاری تے شونداری و شونہالی نا وارخواہی فراوان کننگ کن سنبرینگوک ءِ۔ ڈل چیئرمین سینیٹ نا خصوصی منت واری ءِ ہرفے و پارے کہ بلوچستان نا شونداری کن چیئرمین سینیٹ نا کوشست ستاکڑزک۔