بلاول بھٹو زرداری نا کنڈآن بی آئی ایس پی پروگرام نا زر ءِ ودفنگ انقلابی ءُ گام اسے، وزیر مملکت محمد علی شاہ باچا

پشاور۔ 01 مارچ (اے پی پی) وزیر مملکت و پاکستان پیپلزپارٹی خیبرپختونخوا نا قائم مقام صدر محمد علی شاہ باچا پارینے کہ پارٹی چیئرمین بلاول بھٹو زرداری نا کنڈآن بی آئی ایس پی پروگرام نا زر ءِ ودفنگ انقلابی ءُ گام اسے، داخیال آتا درشانی ءِ او چارشنبے نادے آ پاکستان پیپلزپارٹی خیبرپختونخوانا چندی ڈل آتون گپ وتران کرسا کرے۔ اوپارے کہ وزیر خارجہ بلاول بھٹو زرداری بی آئی ایس پی پروگرام اٹی رجسٹرڈ بندغ آتے 25 درسد زیات زر تننگ نا پڑو کرینے، حقدار بندغ آک یونین کونسل آ ہنسا بی آئی ایس پی پروگرام اٹی رجسٹرڈ مننگ کیرہ، دا گام انا نتیجہ ٹی ساڑی آ کبینی نا دور اٹی نیزگار و بے سیبو بندغ آتے بھلو کچ اسے آ ریلیف ملک۔ وزیر مملکت محمد علی شاہ باچا پارے کہ بی آئی ایس پی  مسکوہی صدر آصف علی زرداری نا کنڈان 2008 اٹی شہید بینطیر بھٹو نا ویژن نا راٹ بناکننگا، پاکستان پیپلزپارٹی نیزگار الس نا جماعت ءِ و الس نا شونہالی ننا منشور ءِ۔ اوپارے کہ بینظیر انکم سپورٹ پروگرام شہید بینظیر بھٹو نا ویژن، نظریہ و منشور نا بشخ ئسک۔ بینظیر انکم سپورٹ پروگرام جہانی کہول آ پذیرائی دوئی کرینے۔ اوپارے کہ بی آئی ایس پی نا کڑد ءِ نئے بیرہ پاکستان بلکن اقوام متحدہ و جہانی بینک ہم امنا کرینو و دادے شفاف انگا ادارہ گوندانو۔ وزیر مملکت پارے کہ ہمو دے مر اف ہراتم پارٹی اقتدار اٹ برسا پاکستان ءِ اسہ وار ولدا تینا نت تیا سلفک۔ اوپارے کہ پاکستان پیپلزپارٹی نا سرکڑدہ غاک ملک ءِ تنکی آن کشنگ کن تینا ہرممکن کڑد ءِ ادا کننگ اٹی ءُ۔