اسلام آباد۔ 28 فروری (اے پی پی) بنجائی وزیر توانائی انجینئر خرم دستگیر خان پارینے کہ چین پاکستان اقتصادی راہداری (سی پیک) نا رداٹ شنگھائی تھرکول ڈٹ آن بجلی نا پیدوار باقاعدہ بناکرینے ہراڑان نیشنل گریڈ سسٹم اٹی پین 1320 میگاواٹ نا ودکی مریک و داڈٹ آن ہندی تھرکول آن بجلی نا جم پیدوار 2640 میگاواٹ مس۔ وزیراعظم محمد شہباز شریف نا کماشی ٹی پی ڈی ایم حکومت چندی شونداری کاریم تتون اوار اوار بجلی نا ڈٹ آتیا ہم ترندی اٹ کاریم کننگ اٹی ءِ۔ بنجائی وزیر پارے کہ پاکستان تحریک انصاف نا مستین نا حکومت نا مجرمانہ ڈیوالئی نا سوب آن غیر معمولی تاخیر نا گواچی مروک آ ڈٹ بالآخر نئے بیرہ گونڈ ءُ وخت اسے ٹی پورو مس بلکن سسٹم ءِ بجلی نا فراوانی ہم بناکرے۔ سے شنبے نادے آ پریس کانفرنس آن تران وزیر توانائی پارے کہ توانائی نا پیدوار اٹی ہندی ایندھن نا کاریم اٹ اتنگ اٹ پیش رفت مسنے۔ اوپارے کہ تھل نووانا 330 میگاواٹ نا ڈٹ مہالو آن دا تُو انا نیام اٹی ہم آہنگ مسنے ، وزیراعظم شہباز شریف نا کماشی ٹی ساڑی حکومت بیرہ 10 تُو اٹی تھرکول نا ہندی وسیلہ غاتیان سسٹم اٹی جم وڑاٹ 1980 میگاواٹ اڑزان بجلی اوار کرینے۔ اومستی پارے کہ تھرکولا نئے بیرہ باسنی تا موسم اٹی بجلی نا لوڈشیڈنگ ءِ کم کننگ اٹ کمکار مریک بلکن داڑان اڑزان بجلی ہم مہیا مریک۔ توانائی گرج آتے پورو کننگ کن ننے پوسکن ءُ ذریعہ ودی کروئی مریک۔ اوپارے کہ اڑزان بجلی تیار کرسا سسٹم اٹ اوار کننگ اُن۔ خرم دستگیر پارے کہ صنعتی صارف آتیکن لوڈشیڈنگ کپننگ انگ ءِ، بجلی دُزی نا توننگ کن پوسکن ءُ ایڈوانس میٹر خلنگ انگ ءِ۔ وخت اس کہ میٹر ریڈنگ نا غاوتا ازالہ کن پوسکن ءُ ٹیکنالوجی اس درستی راستی کرفنگک۔
