آیوکیں نسل آناں ماحولیاتی مٹء ُ بدلی ءِ آثرآں چہ رکینگ ءِ ھاترءَ  درچک  کِشگءَ را الم کنگ  ءِ ضلورت اِنت، اے بہار ءِ موسم ءَ سرجمیں ملک ءَ درچک کِشگی مہم چلائنگ بیت، مزن وزیر محمد شہبا زشریف

اسلام آباد۔28فروری  (اے پی پی): مزن وزیر محمد شہباز شریف ءَ گشتگ کہ آیوکیں نسل آناں ماحولیاتی مٹء ُ  بدلیاں چہ رکینگءِ ھاترءَ درچک  کِشگءَرا الم کنگءِ ضلورت اِنت، اے بہارءِ موسم ءَ  سرجمیں ملک ءَ  درچک  کشگی مہم چلائنگ بیت کہ آئیءِ تہا  24 کروڑ ءَ چہ  گیش درچک کشگ بنت، زند ءِ درائیں تک ءُ  پھناتاں گوں  سیادی داروکیں مردم اے مہم ءِ تہا بہر بزور اَنت،  عالم  ء ُ زانت کار اُلسءِ تہا اے ہوالگءَ سرپدی ودی بہ کن اَنت۔ اے ھیالانی درشانی آئیءَ سئے شمبے ءِ روچءَ بہارءِ موسمءَ  درچک کشگی مہم ءِ بندا ت ءِ موہ ءَ گپ ء ُتران کنان ءَ کتگ۔  ایشی ءَ چہ پیسر مزن وزیر ءَ  نہالے کشتگ ءُ بہار ءِ موسم ءِ  درچک کشگی  مہم ءِ بندات کتگ۔ اے موہ ءَ موحولیاتی مٹء ُ بدلی ءِ بنجاہی وزیر سینیٹر  شیری رحمن، وانگء ُ زانگءِ بنجاہی وزیر رانا تنویر حسین ء ُ مزن تکءِ  حکام ہم ساڑی بوتگ اَنت۔  مزن وزیرءَ گشتگ کہ مرچی ما سرجمیں پاکستان ءَ درچک کشگی مہم 2023 ءِ بندات ءَ کنگءَ اَنت۔ اے درستیں منصوبہ بندی ءِ تہا  مئے موسمیاتی مٹء ُ بدلی ءِ وزیر شیری رحمن ء ُ آئی ءِ ٹیم ءِ حاسیں ھدوناکی ء ُ محنت اِنت، پاکستان ءِ مُچ رقبہ ءِ تہا جنگلات  تنا 5.45 درسد اِنت،  مارا  ایشی ءَ را اشتاپی بنیاتاں دیما برگ لوٹ ایت، 2015 ءَ نیشنل فارسٹ پالیسی  ءِ  شاباشی مئے سروک پیسرگیں مزن وزیر محمد نواز شریف ءَ را دیئگ لوٹ ایت ء ُ  آئی ءَ چہ پد پاکستان ءَ  جنگلات  نوک سرءَ بندات کنگ  بوتگ  ۔ آئی ءَ گشتگ کہ انوگیں ہاراں چہ بازیں جانی ء ُ مالی نقصان بوتگ اَنت، لکھاں مردم بے لوگ بوتگ اَنت، 30 ارب ڈالر ءِ مئے معیشت ءَرا نقصان رستگ، پاکستان ءِتہا درچک کشگ ءَ را الم کنگ ءِ ضلورت اِنت۔ اے موہ ءَ سول سوسائٹی، وکیل ء ُ زند ءِ ہمک تک ء ُ پہناتاں چہ سیادی داروکیں مردماں گوں یک یک دزبندی اِنت کہ اے مہم ءِ تہا بہر بزوراں، عالم ء ُ زانت کار مدرسہ آنی تہا درچکانی ارزشتاناں پدر کنگءِہوالگءَ گامگیج چست بہ کن اَت، نبی کریمؐ   ءِ زند ء ُ حدیثاں چہ مارا درچکانی ارزشت ءِ ہوالگءَ بازیں درور  رسیت، جنگ ءِ تہا ہم  بھر دیئوکیں درچکاناں  گُہڈگ ءَ مکن کنگ بوتگ ،  پاکستان ءَ شہری آبادی کنکریٹ ءِ  جنگل جوڑ بوہگءَ اَنت، مارا شہرآنی تہا ہم درچک ء ُ  گرین ایریا آنی کساس ءِ تہا گیشی کنگ لوٹ ایت ء ُ  براؤن ایریاآناں امیچو کم کُت کنے  ماحول ءِ ھاترءَ باز جوان بیت۔ ایشی ءِ ھاترءَ راج ءَ گوں دزبندی کناں کہ آ اے درچک کشگی مہم ءِ تہا بہر بزوراں ء ُ  آیوکیں نسل آنی بانداتءَ  بہ سمبائیناں ء ُ پاکستان ءِ اُلس ءِ ازمت  ءِ ھاترءَ  ما وتءَرا سرجم ءَ گوں مُچی ءَ  ندر بہ کن اَنت۔