اسلام آباد۔ 27 فروری (اے پی پی) وزیراعظم محمد شہباز شریف قائد مسلم لیگ (ن) محمد نواز شریف و ملک انا آخبت تینا ورناتے ’’یوتھ پروگرام ‘‘ نا 10 سال پورو مننگ آ مبارکبادی ترسا پارینے کہ بنجائی حکومت سال 2023ء ءِ ورناتا سال گوندانے، ملک ءِ مون تروک زرگزرانی مشکل آتیان پد ہم ورناتے گوجالنگ کپنہ، ہندا خاطران یوتھ پروگرام نا دُوارہ بناءِ کننگ انگ ءِ۔ دوشنبے نادے آ ’’یوتھ ویک‘‘ نا وخت آ ورناتیکن تینا کلہو اٹی وزیراعظم محمد شہباز شریف پارے کہ 2011 ٹی پنجاب آن ہرا پروگرام نا بناءِ کریسن، 2013ٹی ہمووخت انا وزیراعظم محمد نواز شریف داپروگرام ءِ مچ آ ملک اٹی سرکرے، دا انقلابی پروگرام ورناتا شونداری ٹی مزل نا نشان مننگ ءِ ، اوفتا تعلیم، کسب کاری، جان جوڑی و روزگار آن ہی پاکستان اٹی شونداری مریک، وزیراعظم داوخت آ دا پڑو کرے کہ بنجائی حکومت 2023ءِ ورناتا سال گوندانے ہراٹی چندی دود آتے اڈتننگک، خواری کش و ہُشار چناتے لیپ ٹاپ تننگک ، ایلو اسکیم تا کمک اٹ ورناتا است بڈی برجاسلک۔ اوپارے کہ ننا ملک انا 68 درسد آبادی ورناتیا تالان ءِ، ہندا ویژن نا رداٹ نن یوتھ پروگرام نا بناءِ کریسن، پنجاب ایجوکیشن انڈومنٹ فنڈ اس جوڑ کننگاسس، لیپ ٹاپ اسکیم نا بناءِ کننگاسس، ورناتے بے سود و آسان شڑت آتیا وام فراوان کننگا، وسیلہ غاتیان محروم ہُشار طالب علم آتے وظیفہ تسن، پیشن نا ملک تعلیم نا وارخواہی فراوان کرین، اینو دا قوم انا قابل مارک و مسنک چندی بشخ آتیٹی سرسہبی تا پوسکن آ بڑزی تیا سرمننگ ءُ۔ وزیراعظم پارے کہ او ہندن ءُ وخت اسے آ ملک انا وزارت عظمیٰ نا منصف آ فائز مس ہراتم ملک ءِ زرگزرانی تنکی تا مون تروک ئسک، نوکاپ مشکل آتیٹی پین ودکی کرے ولے دا مچ آ مشکل آتیٹی ہم ورناتے نن گوجالنگ کپنہ انتئے کہ دا ننا ملک انا آخبت ءِ، ہنداخاطران یوتھ پروگرام نا دُوارہ بناءِ کننگا، وسیلہ و دانا دنگ ءِ پین ودفنگا و کشت وکشار تون اوار ایلو بشخ آتے دا پروگرام اٹ اوار کننگا، بے سود و آسان شڑت آتیا ورناتے وسیلہ تننگ نا دُوارہ بناءِ کننگانے تانکہ ورناک روزگار نا کمک اٹ تینا خاہوت آتا سیبو مریر و اوفتا بھاریم ءِ کم کننگ کیر، ملک انا شونداری ٹی عملی کڑد ادا کیر۔
