اسلام آباد۔27فروری (اے پی پی): مزن وزیر محمد شہباز شریف ءَ مسلم لیگ( ن) ءِ سروک محمد نواز شریف ء ُ ملک ءِ باندات وتی ورناہ آناں ’’یوتھ پروگرام‘‘ءِ 10 سال سرجم بوہگءَ مراد بات داتگء ُ گشتگ کہ بنجاہی حکومت ءَ سال 2023 ءَ را ورناہ آنی سال لیک اِتگ، ملک ءِ معاشی جیڑہ ء ُجنجالاں ابید ہم ورناہ آنی نیمگءَ دلگوش کناں، پہ ہمے ھاترءَ یوتھ پروگرام یک رندے پدا بندات کنگ بوہگءَ اِنت۔ دوشمبے ءِ روچءَ ’’یوتھ ویک‘‘ ءِ موہ ءَ ورناہ آنی ھاترءَ وتی کلوہ ءِ تہا مزن وزیر محمد شہباز شریف ءَ گشتگ کہ 2011 ءَ پنجاپ ءَ چہ کہ ہما پروگرام ءِ بندات کنگ بوتگ 2013ءَ آ وہد ءِ مزن وزیر محمد نواز شریف ءَ ہمے پروگرام ءَ ر اسرجمیں ملک ءَ سرکتگ، اے آشوبی پروگرام ورناہ آنی دیمروئی ءِتہا بُن اِشتے بوہگءَ اِنت، آیانی وانگء ُ زانگ، ہنرمندی، جانء ُسلامتی ء ُ روزگار ءَ چہ پاکستان ءَ دیمروئی بیت، مزن وزیرءَ اے مو ہ ءَ اے جار جتگ کہ بنجاہی حکومت ءَ 2023 ءَ را ورناہ آنی سال لیک اِتگ، کہ ایشی ءِ تہا بازیں مراگش کنگ بنت، محنتی ء ُ زانوکیں زھگاناں لیپ ٹاپ دئیگ بیت، ایندگہ سکیم آنی وسلیگءَچہ ورناہ آناں دلبڈی کنگ بوہگءَ اِنت۔ آئی ءَ گشتگ کہ مئے ملک ءِ 68 درسد آباتی ورناہ آنی ایں۔ مزن وزیر ءَ گشتگ کہ اے مئے ملک ءِ باندات اَنت، پہ ہمے ھاترءَ یوتھ پروگرام یک رندے پدا بندات کنگ بوتگ، آسراتی ء ُ آیانی رسگء َ را گیش کنگ بوتگء ُ کشتء ُ کشاری ءَ ہوار ایندگہ پڑ اے پروگرام ءِ تہا ہوار کنگ بوتگ اَنت، بے سوت ء ُ ارزانیں شرط آنی سرءَ ورناہ آناں آسراتی دیئگ ءِ یک رندے پدا بندات کنگ بوتگ تنکہ ورناہ روزگار ءِ وسیلگءَ وتی حاندان ءِ سہارہ بہ بنت ء ُ آیانی کوپ سُبک بہ بیت، ملک ءِ دیمروئی ءِ تہا وتی عملی کردءَ پیلو بہ کن اِت۔
