اسلام آباد۔ 27 فروری (اے پی پی) صدر مملکت ڈاکٹر عارف علوی پارینے کہ روایتی سیکورٹی اتون اوار اوار ’سائبر قوت‘ نا دوئی کننگ ملک ءِ سوگوی و شونداری نا کنڈا دننگ کیک۔ دوشنبے نادے آ داڑے ایئر یونیورسٹی نا 10 می کانووکیشن نا دود آن تران کرسا صدر دنیا نا پنچ می آبادی والا ملک اٹی ساڑی آ بشخ خاص وڑاٹ مصنوعی ذہانت، سائبر اسپیس و ڈیٹا اٹ چلینگوک آ ٹیکنالوجی ٹی علم دوئی کننگ نا گرج ءِ مون آتخا۔ صدر مملکت پارے کہ پاکستان جوہری ڈیٹرنس کون آ روایتی دفاع ٹی کسبی مہارت دوئی کرینے ولے سائبر اسپیس اٹی سوگو گام ءِ جاگہ تننگ ہم بقاء کن المی ءِ۔ اوداہیت انا پیدواری ءِ کرے کہ تدوک آ سال انا جہانی سائبر رینکنگ اٹی پاکستان اوار اف، دا حالیت، رجعت پسند ذہنیت اٹی اسہ بھلو بدلی اسے آن بیدس کیریئر نا کسر تا گچینی ٹی نظرثانی نا خواست کیک۔ اوپارے کہ سائبر علم ملک انا بھلو ورناآبادی ءِ ساڑی آ کسب آتیان شپ کننگ نا اسہ گچین ءُ ذریعہ اسے۔ اوپارے کہ پیٹرن نا درستی راستی آ تالان ڈیٹا نا اسہ بھلو کچ اس دنیا ٹی دوئی ءِ ہرانا کچ و جاچ ءِ ہلنگ کن مصنوعی ذہانت نا کسب نا گرج ءِ۔ صدر ورناتے کوانٹم کمپیوٹنگ و مصنوعی ذہانت نا بارواٹ المی معلومداری فراوان کننگ نا بارواٹ فیصلہ سازی آ زور شاغا وپارے کہ دنیا دا بشخ آتیٹی اسہ بے مٹ ءُ بدلی اس خنانے۔ اوہائر ایجوکیشن کمیشن (ایچ ای سی ) نا کنڈان جاب مارکیٹ آتیا پورو جاست وپاست کننگ نا اہمیت آ زور شاغا وپارے کہ دا قومی و جہانی ادارہ غاتا گرج آتے پورو کننگ کن اسہ کسبکار انسانی وسیلہ مہیا کننگ اٹ کمک فراوان کیک، ہندا وڑ ملک اٹی بے روزگاری نا ویل ءِ جوان وڑاٹ ایسر کننگ مریک۔ سائبر سیکورٹی ڈسپلن نا اولیکو بیچ انا بارواٹی صدر مملکت دایخین نا درشانی ءِ کرے کہ گریجویٹس پاکستان نا سائبر اسپیس نا رکھ اٹ اہم ءُ کڑد اس ادا کیرہ۔ اوایئر یونیورسٹی نا بورڈ آف گورنرز نا چیئرمین نا تعلیم نا عظیم مسخت آتیکن پدریسہ مخ تفی و سرپرستی ءِ کننگ آ اوفتا ستاءِ کرے۔ داوخت آ صدر مملکت فارغ مروک آ طالب علم آتے ڈگری تس و چندی بشخ آتیٹی اوفتا کوشست آتا ستاءِ کرے۔ دود اٹی چندی بشخ بشمول بزنس ایڈمنسٹریشن ، اکاؤنٹنگ و فنانس، ایوی ایشن مینجمنٹ، ادب و لسانیت ، ریاضی ، طبیعات ، سٹریٹجک سٹڈیز، کمپیوٹر سائنس نا بشخ آتیان بیدس مکینیکل ، میکیٹرونکس ، ایرواسپیس و ایروناٹیکل انجینئرنگ و سائبر سیکورٹی ٹی انڈر گریجویٹ آتون اوار اوار ایم ایس و پی ایچ ڈی پروگرام تا 1300 طالب علم آتے تمغہ و ڈگری تننگا۔ داکان مست وائس چانسلر ایئر یونیورسٹی ایئر مارشل (ریٹائرڈ) جاوید احمد تینا بیابخیری خطبہ ٹی صدر مملکت ڈاکٹر عارف علوی و چیئرمین ایچ ای سی ڈاکٹر مختار احمد نا داوخت آ منت واری ءِ ہرفے۔ اونیشنل ایرو اسپیس اینڈ ٹیکنالوجی پارک انا رداٹ چندی ڈٹ آتا کمک اٹ ٹیکنالوجی نا پڑاٹ پوسکن کننگ و بحال کننگ کن ایئر چیف نا وژن نا ستاءِ کرے۔ اوپارے کہ ایئر یونیورسٹی طالب علم آتے آب اٹ تعلیم، پٹ وپول ، اختراعات و ٹیکنالوجی نا فراوانی ءِ برجاتخک و قومی مسخت اٹی بامعنی ءُ کڑد اس ادا کیک۔
