اسلام آباد۔ 27 فروری (اے پی پی) بنجائی وزیر سمندر پار پاکستانیز و شونداری انسانی وسیلہ ساجد حسین طوری اٹلی ٹی کشتی اسے نا ڈبینگ انگ آن 40 پاکستانی تا زوال کننگ آ ڈکھیائی و است ہسونی نا درشانی ءِ کرینے۔ دوشنبے نادے آ تینا ہڑزخواہی کلہو اٹی او پارے کہ ہڑدے دڑد ناک واقعہ غاتیٹی غیرکانودی پردیسی تا قیمتی جونک زیان مننگ اٹی ءُ، انسانی اسمگلرآک ورناتے روشنا ءُ تغ نشان ترسا ریفنگ اٹی ءُ۔ اوپارے کہ داتم اسکان ہزار آپاکستانی ورناک سمندر نا لہر آتیٹی تینا جون تیان دوتے سلانو، وزارت داخلہ تون اواری اٹ انسانی اسمگلر آتا برخلاف سخت کانودی کارروائی کن جوان ءُ پالیسی اس تیار کینہ۔ بنجائی وزیر پارے کہ انسانی اسمگلر آتا پاسپورٹ آتے منسوخ، شناختی کارڈ آتے بلاک و بینک اکاؤنٹ آتے منجمد کننگے، پیشن نا ملک آتیان دا گندہ انگا ڈوہ اٹی اوار انسانی بندغ آتا دزگیری کن انٹرپول تون رابطہ کننگے، انسانی اسمگلر آتا سوب آن قیمتی جون تا زیان و پاکستان نا بدنامی مننگ اٹی ءِ۔ اوپارے کہ وزارت شونداری انسانی وسیلہ پاکستانی تیکن کانودی روزگار نا وارخواہی پٹنگ اٹی ءِ، اپریل 2022 آن داتم اسکان شش لکھ آن زیات پاکستانی تے کانودی وڑاٹ ملازمت کن پیشن نا ملک آتیا گدریفنگانے۔ ساجد حسین طوری پارے کہ غٹ پاکستانی تیان خواست ءِ کہ غیرکانودی وڑاٹ پیشن نا ملک آ ہِننگ آن پاناد کیر ، لمہ و باوہ پیسہ نا لالچ اٹ تینا چناتے مرک انا باٹی تفس۔
