راولپنڈی۔ 27 فروری (اے پی پی) پاکستان نا عسکری سرکڑدہ غاک ’’آپریشن سوئفٹ ریٹارٹ‘‘ نا 4 سال پورو مننگ آ پاکستان نا سلہہ بند فوج و الس ءِ خراج تحسین پیش کرسا پارینو کہ پاکستان نا برخلاف ہروڑنا جارحیت اٹی جنگ دشمن نا علاقہ ٹی کینہ۔ ڈی جی آئی ایس پی آر تینا ٹویٹ نا کمک اٹ سرپرائز ڈے آ چیئرمین جوائنٹ چیفس آف اسٹاف کمیٹی و ہرمسٹ آ سلہہ بند فوج انا سروک آتا کلہو ءِ جاری کرے ہراٹی عسکری سرکڑدہ غاک ’’آپریشن سوئفٹ ریٹارٹ‘‘ نا 4 سال پورو مننگ آ پاکستان نا سلہہ بند فوج و الس ءِ خراج تحسین پیش کرینو۔ عسکری سرکڑدہ غاک پاریر کہ بھارت پلوامہ فالس فلیگ آپریشن آن پد لغوری جلہو نا کوشست کرے ، آپریشن سوئفٹ ریٹارٹ نا وخت آ سلہہ بند فوج و الس گچین عزم انا درشانی ءِ کریر، پاکستان گچین و دلیری اٹ ورندی ترسا بھارت نا ناپاک عزم ءِ مش تا کرے۔ 27 فروری داہیت اناشاہدی ءِ کہ پاکستانی پرامن قوم اسے ءُ، سلہہ بند فوج وطن نا کونہ کونہ نا رکھ اکن پبی تیار ءِ۔ پاکستان نا برخلاف ہروڑنا جارحیت اٹی جنگ دشمن نا علاقہ ٹی تننگک۔ آئی ایس پی آر نا کنڈان مستی پاننگاکہ پاکستان نا برخلاف ہرمس ایڈونچر نا ورندی ءِ سلہہ بند فوج و الس پبی طاقت اٹ ایترہ۔ یات سلے کہ 27 فروری 2019 اٹی پلوامہ جلہو نا دروغ انا پروپیگنڈا و کنٹرول لائن ءِ پار کننگ نا غلطی آ پاکستان بھارت ءِ ’’آپریشن سوئفٹ ریٹارٹ‘‘ نا حالیت اٹ سخت ءُ ورندی اس تسوسس۔ چار سال مہالو اینو نادے پاک فضائیہ نا شاہینک اِرا بھارتی جنگی جہاز ءِ خلکوسر، و بھارتی ونگ کمانڈر ابھی نندن ءِ دزگیر کریسر اوکان پد “Tea Is Fantastic”بھارتی فضائیہ نا بے سہبی نا استعارہ جوڑ مس۔
