اسلام آباد۔ 24 فروری (اے پی پی) وزیردفاع خواجہ محمد آصف مستین اٹی مروک آ ردینک آتا ازالہ و ساڑی آ تنکی نا ایسری کن عدالت عظمیٰ نافل کورٹ اسے نا ٹہیفنگ نا گرج آ زور شاغسا پارینے کہ ملک تنکی اسے سگنگ کپک، کانود و آئین نا پیروی ءِ کرسا تنکی ءِ ایسر کننگ عدلیہ و ننا غٹ آ فرض و قرض ءِ، ’’جیل بھرو تحریک‘‘ فلم فلاپ مسنے داسہ ’’ڈوب مرو ‘‘ فلم اس چلفینگے۔ جمعہ نادے آ قومی اسمبلی نا دیوان اٹی گپ وتران کرسا خواجہ محمد آصف پارے کہ داوخت آ سپریم کورٹ نا مون آ اسہ ازخود نوٹس نا رداٹ گڑاس سوج تخنگانے ہرافتا ورندی تے سپریم کورٹ اٹی تننگک، داٹی سیاسی پارٹی، حکومت، الیکشن کمیشن، بارکونسلز وبار ایسوسی ایشن آک ہم فریق ءُ، اہمیت نا حامل مقدمہ بناکرینے، دانا اثرآک ساڑی آ حالیت آتیا آخا بلکن آخبت ناسیاسی حالیت آتیا مرتب مننگ کیک۔ اوپارے کہ ستاکڑزوک ہیت دادے کہ 9 جج آتا بنچ اس جوڑ کننگانے ولے اسہ سیاسی ورکراسے نا وڑاٹ ادب و شرف اٹ او پاہک کہ دا ویل فل کورٹ انا خواہندار ءِ، مچ آ سپریم کورٹ تولسا دا ویل انا ایسری اس پٹے و فریق آتیان اَریفے و ہندن ءُ ایسر اس ایتے ہرانئے بیرہ بروک آ وخت اکن تریاق مرے بلکن مرض انا ہم بست وبند ءِ کے۔ وزیر دفاع پارے کہ او کانود، آئین و روایت آتے لتاڑنگ خواپک و نئئے تنقید کننگ خواہک، اسہ غاو اس سلک کہ اسہ سیاسی ورکراس عدلیہ نا پن ءِ ہلسا تنقید کیک، جسٹس منیر آ تنقید مریک ولے جسٹس کارنیلیس آ تنقید مفک؟، داوڑ انت اکن مریک کہ جسٹس ارشاد حسن و ریاض شیخ آ تنقید مریک ولے سعید الزمان صدیقی و ناظم صدیقی آ تنقید مفک؟ پانامہ نا جج آتیا انت اکن تنقید مریک ہرافک نوازشریف نا برخلاف ریمارکس پاس کریر؟ ثاقب نثار و کھوسہ نا پن ءِ ہلنگک ولے جسٹس تصدق جیلانی نا پن ءِ ہلپننگک؟ پارلیمنٹرین آ تنقید کننگک تو سوب آتے بیان کننگ ننا حق ہم ارے، عدلیہ نا تینا سوچ آ الیوہ کہ ہراجج آتا پن ءِ ہلنگک و ہراسٹ نا ہلپننگک۔ اوپارے کہ ہرا سوج آتے مرتب کننگانے اوفتیان اسہ سوج اس بنچ انا کنڈان کننگانے کہ ہرااِرا صوبائی اسمبلی تا تحلیل مسنے اوفتا انت اکن جاچ ءِ ہلنگپ۔ یا داکان مست ہِننگے ہراتم 63 اے ءِ دُوارہ نوشتہ کننگا۔ اوپارے کہ مستین نا واقعہ غاتیٹی ہرافک اوارئسر اوفتا اعتراف ہم مون آ بسنے کہ پانامہ ٹی نواز شریف تون انت مسوسس، نواز شریف تون ہرازیادتیک مسر، اونا حکومت ءِ فارغ کننگا و اودے تاحیات نابود کننگا ہموہراادارہ ءِ ہرانا باسک آتے اسہ پین ادارہ اس تاحیات نابود کیک۔
