اسلام آباد۔ 24 فروری (اے پی پی) پاکستان فارن آفس ویمن ایسوسی ایشن نا اسہ ڈل اس بھسکار زمی جمب آن زہمی ترکی و شام انا ایلم الس کن عطیہ تننگ ناغرض اٹ ترکی نا سفیر مہمت پیکاسی و شام انا سفیر رمیز الراعی تون داڑے اوڑدہی کرینے۔ جمعہ نادے آ دفترخارجہ نا ترجمان نا کنڈان جاری بیان نا رداٹ پاکستان فارن آفس ویمن ایسوسی ایشن نا صدر مسز زنیرہ اسد اوفتے چیک ہم پیش کرے۔ پاکستان فارن آفس ویمن ایسوسی ایشن نا صدر ہڑتوم آ ملک آتیٹی زمی جمب آن قیمتی جون تا است ہسون نسخان و بھلو کچ اسے آ بھسکاری آ ہڑزخواہی نا درشانی ءِ کرے۔ اوکہوک آتیکن دعا و باہمت ایلم مخلوق کن زوت دراخ جوڑی نا دعا کرے۔ ترجمان نا رداٹ پاکستان فارن آفس ویمن ایسوسی ایشن نا کنڈان تروک آ عطیہ گرج انا داوخت ترکی و شام انا ایلم الس کن وزارت خارجہ نا یکجہتی و مخ تفی ءِ ظاہر کیک۔ پاکستان فارن آفس ویمن ایسوسی ایشن ملک اٹی 2005 نا زمی جمب، 2010 و 2022 نا نوکاپ تون اوار پیشن نا ملک و قومی کہول آ قدرتی آفت آتا زہمی تا راجی آسراتی و ہلہلہ ئی امداد نا کوشست آتیٹی ہم زیات آن زیات بشخ ہلکنو۔ پاکستان فارن آفس ویمن ایسوسی ایشن اسہ رجسٹرڈ غیرسرکاری تنظیم اسے ہرا پاکستان فارن سروس نا آفیسر آتا شریک حیات و پاکستان نا زالبول سفارت کار آتے خیراتی کاریم تیکن یکجا کیک۔
