اسلام آباد۔ 23 فروری (اے پی پی) پاکستان اسلامی کمکارتنظیم (او آئی سی ) نا وزراء خارجہ کونسل نا سروک نا حیثیت اٹ 8 مارچ آ نیویارک اٹی اقوام متحدہ نا ہیڈ کوارٹر اٹی ’’اسلام اٹی زالبول : اسلامی دنیا ٹی زالبول آتا حق و شناخت ءِ سمجھنگ‘‘ نا سرحال آ اسہ دے ئی کانفرنس اسے نا مہمانداری ءِ کیک۔ دفترخارجہ نا ترجمان پنچ شنبے نادے آ داڑے پریس حوال اٹی پارے کہ پاکستان دا کانفرنس نا بست وبند ءِ اقوام متحدہ نا ہیڈ کوارٹر اٹی زالبول آتا حیثیت نا بابت اقوام متحدہ نا کمیشن نا 67 می دیوان نا وخت آ کننگ اٹی ءِ۔ کانفرنس نا مسخت اسلام اٹی زالبول آتا حق انا بارواٹی تصور و حقیقت نا پرخ ءِ چٹفنگ و پنی آ مسلم زالبول آتا آزموندہ و سرسہبی تا جشن ءِ اڈتننگ ءِ۔ دا فورم نا مسخت زالبول آتا حیثیت نا بابت اقوام متحدہ نا کمیشن نا دیوان نا وخت آ اسہ سالانہ پالیسی ڈائیلاگ اس جوڑ کننگ ءِ تانکہ چیلنج آتون مون تننگ و او آئی سی ملک آتیٹی زالبول آتا کڑد ءِ مون آ دننگ نا وارخواہی تے پٹنگ مرے۔
