چناتا تعلیم گچین آخبت نا ضمانت ءِ، تعلیم نا فراوانی ءِ اولیت جوڑ کروئی مریک، صدر مملکت ڈاکٹر عارف علوی

اسلام آباد۔ 22 فروری (اے پی پی) صدر مملکت ڈاکٹر عارف علوی اسکول آتیان پیشن چناتا تعلیم آ پبی چکار کننگ نا گرج آ زور شاغسا پارینے کہ چناتا تعلیم گچین آخبت نا ضمانت ءِ، گچین جمہوری نمائندہ غاتے تعلیم نا فراوانی ءِ اولیت جوڑ کروئی مریک، تعلیم نا مون آ دننگ کن سخیک ہم میدان اٹ بریر، زالبول آتے واکدار کننگ ساڑی آ دور اٹی شونداری کن المی ءِ۔ داخیال آتا درشانی ءِ او چارشنبے نادے آ داڑے ’’تعلیم آن محروم چناک‘‘ چیلنج و مون آ ہِننگ نا کسر‘‘ نا سرحال آ اڈہلوک دود آن تران کرسا کرے۔ دود انا بست وبند ءِ پاکستان انسٹی ٹیوٹ آف پارلیمانی سروسز(پپس ) پاکستان ٹیچرز فورم نا شریداری اٹ کریسس۔ دود اٹی پارلیمنٹ نا باسک آک، تعلیم نا چاہندار و ایلو اہم شخصیت آک بشخ ہلکر۔ صدر مملکت پارے کہ علم انا مون آ دننگ راج انا شونداری کن المی ءِ، تعلیم نا بشخ خاص وڑاٹ اسکول آتیان پیشن چناتا تعلیم و تربیت آ چکار کننگ نا مثبت بھرم دوئی مریک،  تعلیم نا بشخ انا گچینی کن حکومت تون اوار اوار راج ءِ ہم تینا زمواری تے پورو کروئی مریک۔ اوپارے کہ ’’آؤٹ آف سکول چلڈرن‘‘ آن 10 درسد نا تعلق پاکستان آن ءِ ہرا خوفناک ءِ۔ ملک اٹی پرائمری اسکول آتیٹی خوانوک آ چناتا کچ بیرہ 68 درسد ءِ۔ صدر مملکت ورناتے تعلیم یافتہ و کسبکار جوڑ کننگ نا گرج آ زور شاغا و پارے کہ تعلیم نا بشخ ءِ گچین کرسا پاکستان ءِ اقتصادی وڑاٹ سوگو کننگ مریک۔ ڈاکٹر عارف علوی پارے کہ کچ اٹنگا وسیلہ غاتیان پد ہم پاکستان آن ڈاکٹر و انجینئر بھلو کچ اسے ٹی تربیت نا دوئی کننگ آن پد پیشن نا ملک آ کارہ۔ نن تینا اولیت آتا بایدے تعین ءِ کین، اسکول آتیان پیشن چناتے ہم تعلیم نا حق بایدے ملے۔ اوپارے کہ تعلیم و ’’سکل سیٹس‘‘ آن بیدس ایس ایم ایز و فیصلہ سازی نا عمل آ چکار و اودے ودفنگ نا گرج ءِ۔ اوپارے کہ پاکستان آن چپ ڈیہہ نا ایلو ملک آک پرائمری تعلیم آ تینا پبی چکار ءِ تخار ہرانا نتیجہ ٹی او تعلیم نا بشخ آن بیدس اقتصادی شونداری ٹی ہم مون آ ہنانو۔ اوپارے کہ ڈیہہ نا گڑاس ملک اک پرائمری نا تعلیم اٹی 98 آن 100 درسد ہدف دوئی کریر وخت اس  کہ پاکستان اٹی دا کچ بیرہ 68 درسد ءِ۔