جیل بھرو تحریک نا بابت انت حکمت عملی اسے کنے سمااف، بنجائی وزیر خواجہ سعد رفیق

لاہور۔ 22 فروری (اے پی پی) بنجائی وزیر ریلوائی و ہوابازی خواجہ سعد رفیق پارینے کہ ذاتی وڑاٹ سیاسی کارندہ غاتا زندان آ ہِننگ ءِ جوان تکپرہ، کنا وس اٹی مروسس تو کس اسے دزگیر کتوٹہ، جیل بھرو تحریک نا بابت انت حکمت عملی اسے کنے سمااف، نگران حکومت جوان چاہک، کس اسے غلط ہلنگ نا مخ تفی ءِ کپنہ۔ چارشنبے نادے آ داڑے احتساب عدالت لاہور اٹی پیشی نا وخت آ میڈیا تون گپ وتران کرسا خواجہ سعد رفیق پارے کہ تحریک انصاف والاتے پرویز الٰہی مبارک مرے، عمران خان و پرویز الٰہی ہڑتوم آک اسہ وڑ یکجا مسنو۔ اوپارے کہ عمران خان  ہرافتے کرینگ تسکہ گرج تمنگ آ اوفتے سینہ ٹی خلیک۔ عمران خان پرویز الٰہی ءِ کرینگ تسکہ داسہ اودے پارٹی ٹی اوار کرے، عمران خان آ ہچ ءُ اعتبار اس اف۔ اوجیل بھرو تحریک نا سوج آ پارے کہ اخلاقی وڑاٹ لیڈر  اول زندان آن کائے ولے عمران خان تینا ضمانت آتے کرفنگ ءِ و سنگت آتے زندان آ گدریفنگ ءِ۔ بنجائی وزیر پارے کہ نواز شریف و اونا خاہوت زندان کاٹار، شاہد خاقان عباسی چندی پیشی تے تسنے، مچ آ (ن) لیگ ءِ زندان اٹ شاغنگا نن تو پوہاڑ کتون، ننے وخت اس ہوغساخنانرے؟ دا چارمیکو دے ہی پوہاڑ کرسا پیشن بریرہ، عمران خان تون داسکان تو ہچ اس متنے ، ہراکہ ننتون مس عمران خان تون تو اونا دہ می بشخ ہم متنے، عمران خان نا تو داسکان خاہوت ہم بچوک ءِ۔ خواجہ سعد رفیق پارے کہ ملک آن سیاسی انتقام بایدے چٹے، عمران خان وخت اس ہم تینا زنچک اٹ ہلتنے ہُتنے، عمران خان انتقام نا ہیت ءِ کیک۔ میڈیا نا سو ج آ او پارے کہ استیفہ تروک آ چیئرمین نیب آفتاب سلطان ءِ چاوہ او دیانتدار ءُ بندغ اسے، ذاتی وڑاٹ اونا شرف ءِ کیوہ، سانحہ بارکھان نا خاہوت ءِ بایدے انصاف ملے۔ داکان مست تینا اسہ ٹویٹر کلہو اسے ٹی خواجہ سعد رفیق نا پاننگ ئس کہ انتظامی باندات آتیٹی کھلی عدالت مداخلت ریاست ءِ چلینگ کن اِلیپک۔