بنجائی وزیر آغا حسن بلوچ نا کامسیٹس یونیورسٹی ٹی کوئز اٹی غیر اسلامی و غیر فطری سوج اس اَریفنگ نا باندات آ ترندی نا درشان، یونیورسٹی نا گام گیج آک گنج اس و است جم مفننگ گوندنگار

اسلام آباد۔ 21 فروری (اے پی پی) بنجائی وزیر سائنس و ٹیکنالوجی آغا حسن بلوچ کامسیٹس یونیورسٹی ٹی بی ای ای نا فرسٹ سمیسٹر انگلش نا مضمون اٹی طالب علم آتیان کوئز اٹی غیر اسلامی و غیرفطری سوج اَریفنگ نا باندات آ سخت ترندی نا درشانی ءِ کرینے۔ وزارت سائنس و ٹیکنالوجی نا کنڈان سے شنبے نادے آ جاری پریس ریلیز نا رداٹ بنجائی وزیر یونیورسٹی نا کنڈان ہلوک آ ایکشن ءِ گنج اس و است جم مفننگ گوندسا دا باندات نا اول سرآن جاست وپاست ءِ کننگ کن وزارت نا کنڈان اِرا باسک آتیا تالان انکوائری کمیٹی اس جوڑ کرینے۔ انکوائری کمیٹی اسہ ہفتہ نا تہہ ٹی جاست وپاست ءِ پورو کرسا تینا سلاہ وسوج آتے بنجائی وزیر ءِ جمع کرفک ہرافتے مون آ تخسا غٹ اوار کڑد آتا برخلاف ایکشن ہلنگک۔ بنجائی وزیر آغا حسن بلوچ ریکٹر کامسیٹس ءِ پین پارت کرسا پارے  ہراتم اسکان انکوائری کمیٹی نا سلاہ و سوج آک مون آ بتنو ہموتم اسکان ایگزامینیشن ڈیپارٹمنٹ و اوڑتون تعلقدار ڈیپارٹمنٹ آتا سروک آتے معطل کننگے۔ بنجائی وزیر پارے کہ امتحان تون تعلقدار ڈیپارٹمنٹ آتا لاپرواہی نا سوب آن بے ہودہ، غیر اخلاقی و غیر اسلامی سوج ءِ بنائی ریسہ ٹی نوٹس کننگ متو۔ بنجائی وزیر پارے کہ ساڑی حکومت وزیراعظم شہباز شریف نا کماشی ٹی داوڑنا کلچر و روایت آتے ہرافتا بنداو غیراخلاقی و غیر اسلامی تصور مرے ، اسُل سگپک۔ آغا حسن بلوچ پارے کہ ساڑی حکومت شعبہ تعلیم اٹی پوسکن آ سائنسی علم اتون اوار اوار اسلامی نظام نا قدر و روایت آتا رکھ و اوفتے مون آدننگ کن ہرممکن گام گیج کیک۔