کوئٹہ۔ 21 فروری (اے پی پی) وزیراعلیٰ بلوچستان میر عبدالقدوس بزنجو نا مستونگ نا علاقہ ببری چیک پوسٹ و چمن اٹی پولیس ناکہ غا سم کاری نا واقعہ غاتا ترند انگا لوز آتیٹی مذمت ءِ کرینے، او مستونگ اٹی اِرا لیویز کارندہ غاتا شہیدی و چمن اٹی پولیس کارندہ نا ٹھپی مننگ آ ڈکھیائی و است ہسونی نا درشانی ءِ کرینے۔ وزیراعلیٰ سیکرٹریٹ ہاؤس آن جاری کروک بیان نا رداٹ وزیراعلیٰ بلوچستان میر عبدالقدوس بزنجو پارے کہ دہشت گردی نا ساڑی آ واقعہ غاک گڑتی نا سوب ءُ، دہشت گرد زموار آتے کانود نا گرفت اٹ اتنگ کن غٹ وسیلہ غاتے کاریم اٹ اتنگک، ننے ملک دشمن زموار آتا سازش آتے بے سہب کننگ کن پین مستعد و چست رہینگوئی مریک۔ میر عبدالقدوس بزنجو مستی پارے کہ کانود نافذ کروک آ ادارہ غاک تینا زمواری تا ادائیگی ءِ پورو کیر وامن و شونداری نا برخلاف چم آتے بے سہب کننگ کن الس ہم متحد مرے۔ اوشہید کارندہ غاتا خاہوت آتون ہڑزخواہی و ہمدردی نا درشانی ءِ کرے و دعاکرے کہ اللہ تعالیٰ شہید آتا بخشش و خاہوت آتے صبر جمیل عطاکے۔
