اسلام آباد۔ 21 فروری (اے پی پی) بنجائی وزیر ڈٹ بندی ، شونداری، اصلاحات و خصوصی گام گیج پروفیسر احسن اقبال پارینے کہ بزنس انٹرپرائز راج انا شونداری ٹی اہم ءُ کڑد اس ادا کیک، پاکستان موسمیاتی بدلی آن زیات زہمی مروک آ ملک آتیٹی اوار ءِ، نناسیارہ ترندی اٹ موسمیاتی بدلی تا اثر آتا مون اٹی ءِ۔ داخیال آتا درشانی ءِ او سے شنبے نادے آ چاگڑد و جان جوڑی نا بابت قومی فورم آن تران کرسا کرے۔ بنجائی وزیرپارے کہ بزنس انٹرپرائز انڈسٹری نا انجن ءِ ، بزنس انٹرپرائز راج انا شونداری ٹی اہم ءُ کڑد اس ادا کیک، ہرا بزنس تینا فائدہ غاتے ٹی تینا ملازم و علاقہ ءِ اوار کیک او دیرپا شون ہلیک۔ اوپارے کہ ننا سیارہ ترندی اٹ موسمیاتی بدلی نا اثرآتا مون اٹی ءِ و پاکستان موسمیاتی بدلی آن زیات زہمی مروک آ ملک آتیٹی اوار ءِ، ننا سیارہ نا ایکو سسٹم خراب مننگ ءِ، فوڈ سیوکرٹی ویل شدت اختیار کرسا ہِننگ ءِ، ہنداخاطران ننے سنجیدگی اٹ چاگڑد دوست پالیسی تے تینا کننگ نا گرج ءِ۔ بنجائی وزیر پارے کہ راجی زمواری نا شور ہمووخت آ مس ہراتم نن چائلڈ لیبر نا مون اٹی بس، دنیا ٹی ودی مروک آ ناہمواری ءِ چٹفنگ کن پائیدار شونداری نا ہدف آتا ایجنڈااس تینا کننگا، پائیدار شونداری نا ہدف آتے دوئی کننگ کن شریداری ءِ مون آ دننگانے۔ اوپارے کہ کارپوریٹ راجی زمواری تا خواست ءِ کہ زموار رویہ غاتے مون آ دننگے، ننتون اِرا ہی کسر ءُ اسٹ بھسکاری نا و ارٹ میکو شونداری نا کسر ءِ۔ ننا مون آ وام تا مش و تلارآک ءُ، دافتیان بچنگ کن پاکستانی برآمد آتے مون آ دروئی مریک۔ اوپارے کہ پاکستان اٹی لائخی تا کمتی ءِ نئے وسیلہ غاتا، نئے تعلیم یافتہ بندغ آتا کاختی، ولے پالیسی سازی ٹی سیاسی نزوری و افراتفری نا سوب آن نن پدی سلیسونن۔احسن اقبال پارے کہ زرگزرانی پالیسی ءِ بارآور مننگ کن کم آن کم دہ سال درکار مریک ۔ 2013 ٹی 18،18 گھنٹہ لوڈشیڈنگ ئسک۔ ملک اٹی دہشت گردی ترند ئسک۔ چار سال اٹی 11 ہزار میگاواٹ بجلی نا ڈٹ آتے خلنگا وخت اس کہ سی پیک نا رداٹ 29 ارب ڈالر نا زرکاری مس۔ بنجائی وزیر ڈٹ بندی مستی پارے کہ 2018 نا آزموندہ ملک ءِ زرگزرانی وڑاٹ بھس کرے، سی پیک نا ڈٹ آتے بند کننگا، دنیا ٹی حکومت آک بدلینگرہ ولے پالیسی بدل مفسہ۔ نن 2018 ٹی 1000 ارب نا شونداری بجٹ اِلان و چار سال آن پد کنے 500 ارب نا شونداری بجٹ ملا۔ 2017 ٹی ڈیٹ سروسنگ1700 ارب ئسک، ہراتم حکومت اٹی بسن تو 5200 ارب اسکان سرمسوسس۔ حکومت ملک ءِ شونداری نا کنڈا دننگ کن نجی بشخ ءِ آسودہی تننگ ءِ۔ سیاسی سوگوی و پالیسی تا چرجوئی شونداری کن المی ءِ۔
