اسلام آباد۔ 21 فروری (اے پی پی) پیس اینڈ کلچر آرگنائزیشن نا چیئرپرسن و حریت راہشون یاسین ملک نا اُرائی مشعال حسین ملک بھارت نا غیرکانودی کوزہ ٹی جموں وکشمیر نا بابت خاموشی اختیار کننگ آ جہانی برادری و اقوام متحدہ غا تنقید کرسا پارینے کہ جہانی برادری کشمیری تا است ءِ ہسون کروک آ فریادآتے ہم بنپک، کشمیری مسنک سال آتیان بھارتی زندان تیٹی غیرکانودی وڑاٹ نظر بند تینا باوہ غاتا رہائی نا خواست ءِ کننگ اٹی ءُ۔ کشمیر میڈیا سروس نا رداٹ مشعال ملک اسہ بیان اسے ٹی پارے کہ بھارتی حکومت ڈھیٹی اٹ مقبوضہ کشمیر اٹی کشمیری تا بنداوی حق انا خلاف ورزی و ریاستی دہشت گردی ءِ برجاتخانے ولے پن انا مہذب دنیا انسانی حق انا دا بدترین خلاف ورزی تیا خاموشی اختیار کرینے۔ اوپارے کہ ضلع بارہمولہ نا چندی خاہوت آک تینا چناتتون اوار پریس کالونی سرینگر اٹی کیہی سال آن چندی زندان تیٹی بند تینا رشتہ دار آتا مقدمہ غاتا سماعت اٹی تاخیر نا برخلاف برانز کریر۔ اوپارے کہ کودک مسنک خڑینکی آ خن تتون بند کشمیری باوہ نا دمدستی بنداو تیا رہائی نا خواست ءِ کننگ اٹی ءُ، انتئے کہ او فسطائی مودی حکومت نا کنڈان اوفتے تون روا تخوک آ وحشیانہ سلوک آن جوانی اٹ بلد ءُ۔ اوپارے کہ اسہ چنکو چناس ہرا تینا باوہ ءِ تدوک آ پنچ سال آن خنتنے ۔ مشعال ملک جہانی واکدار و انسانی حق انا تنظیم تیا زور شاغا کہ او دا کودک روح تا فریاد ءِ بنر ہرا سیاسی وڑاٹ جعلی مقدمہ غاتیٹی بھارتی زندان تیٹی بند تینا باوہ پیروہ نا رہائی ءِ خواہرہ۔ اوپارے کہ ایلو کشمیری مسن تیانبار رضیہ سلطانہ ہم کم و ود 9 سال آن تینا باوہ ءِ خنتنے ہراکیہی وار اقوام متحدہ نا ادارہ غاتیان تینا باوہ نا رہائی و اوڑتون اوڑدہی ءِ پک کننگ نا خواست کرے ولے نئے دنیا و نئے بدنام زمانہ مودی سرکار اونا کنڈا چکار اس کرے۔ مشعال ملک جہانی برادری و اقوام متحدہ نا ادارہ غاتیا زور شاغا کہ او اونا اَرے تون اوار کشمیری سیاسی بندی تا دمدستی رہائی ءِ پک کیر انتئے کہ اوغٹ ءِ ڈوہ اسے کن آخا بلکن بیرہ کشمیر نا جہد آجوئی نا شعلہ غاتے کسفنگ کن زندان تیٹی شاغنگاسس۔ اوپارے کہ کشمیر نا ویل اسہ جہانی ءُ جھیڑہ اسے نئے کہ بھارت نا تہہ انا باندات ہرادے اقوام متحدہ نا قرارداد آک امنا کرینو، ہنداخاطران کشمیر نا ویل ءِ اونا تاریخی رداٹ ایسر کننگے۔ حریت راہشون پارے کہ دی گارڈین بھارت نا غیرکانودی کوزہ ٹی جموں وکشمیر آ بوچر پیپرز جاری کپننگ آ بھارت نامکروہ دروشم ءِ بے نقاب کرے ہرافتے ٹی جنرل رائے بوچر نہرو ءِ کشمیر نا ویل ءِ اقوام متحدہ ٹی پرامن ایسری کن دننگ نا مشورہ تس ولے وخت بننگ آ الحاق آ کوزہ کننگاسس۔ یات سلے کہ کشمیر آ بوچر پیپرز اٹی جواہر لعل نہرو و جنرل رائے بوچر نا نیام اٹ کشمیر و جنگ بندی آ خط و کتابت ساڑی ئسک۔ اوپارے کہ کشمیری تتون کروک آ آجو ریاست ناقول انا خلاف ورزی ءِ کننگا و داسہ فسطائی مودی سرکار کشمیری تتون کروک آ قول انا خلاف ورزی ءِ مون آ اتنگ آن توننگ نا کوشست کرے۔
