انقرہ۔ 21 فروری (اے پی پی) ترکیہ و شام انا سیمی علاقہ اسہ وار ولدا ترندانگا زمی جمب آن سُرا، انطاکیہ ٹی 6.4 نا زمی جمب نا سوب آن مسہ بندغ زوال وخت اس کہ جم وڑاٹ 680 آن زیات بندغ ٹھپی و چندی ماڑیک بھس مسر، زوال کروک آتیٹی پین ودکی نا گڑتی ظاہر کننگ انگ ءِ۔ درملکی خبررساں ادارہ نا رداٹ زمی جمب انا مرکز ترک صوبہ ہاتائے نا خڑک ئسک وخت اس کہ زمی جمب نا لوڈو اردن، مصر و شام اٹی ہم محسوس کننگانے، زمی جمب نا سوب آن ترکیہ ٹی 213 وخت اس کہ شام اٹی 470 نا خڑک بندغ ٹھپی مسنو۔ ترک وزیر داخلہ سلیمان سویلو پارے کہ زمی جمب آن زوال کروک آ بندغ انطاکیہ و خڑکی علاقہ غاتیان تعلق تخرہ وخت اس کہ مخلوق ءِ خطرناک ماڑی تیٹی داخل مفننگ نا تاکید کننگانے۔ عینی شاہدی تا رداٹ انطاکیہ ٹی ماڑی تے پین نسخان رسینگانے وخت اس کہ سویلی ترکیہ ٹی ہاتائے نا میئر نا پاننگ ءِ کہ مخلوق بھس مروک آ ماڑی تا کیرغ اٹی اختہ ءُ۔ ترکیہ نا ڈیزاسٹر اینڈ ایمرجنسی ایجنسی پارے کہ زمی جمب آن پد درزن تا حساب اٹ آفٹر شاکس ہم بسنے۔ ایلو کنڈا شام انا تنظیم آبزرویٹری فارہیومن رائٹس نا پاننگ ءِ کہ ساڑی آ زمی جمب آن پد 32 آفٹر شاکس ریکارڈ کننگانے ہرافتیان غٹ آن بھلا لوڈو نا شدت 5.8 ئسک وخت اس کہ 470 ٹھپی تے ہسپتال آ اتنگانے۔ یات سلے کہ ترکیہ نا ہند اعلاقہ ٹی 6 فروری آ 7.8 شدت نا زمی جمب بسوسس ہراٹی ترکیہ و شام اٹی 47،000 آن زیات بندغ زوال کریسر۔
