لاہور۔ 19 فروری (اے پی پی) گورنر پنجاب محمد بلیغ الرحمان تون یک شنبےنادے آ گورنر ہاؤس لاہور اٹی گورنر سندھ کامران خان ٹیسوری اوڑدہی کرے۔ گورنر پنجاب گورنر سندھ ءِ پنجاب اٹی بخیر اٹ پارے۔ اوڑدہی ٹی ملکی سیاست و تین پہ تینی است خواہی نا امور آ گپ وتران کننگا۔ داوخت آ گورنر پنجاب کراچی پولیس چیف انا آفس آ دہشت گرد آرتا جلہو نا مذمت ءِ کرے۔ گورنر پنجاب رینجر و پولیس نا کارندہ غاتے دہشت گردآتا برخلاف سرسہب آپریشن آ خراج تحسین پیش کرے۔ گورنر پنجاب پارے کہ شہید کارندہ غاک تینا جون تے ندر کرسا دہشت گرد آتا ناپاک عزم ءِ بے سہب کریر۔ اوملک اٹی ودوک آ دہشت گردی نا رداٹ پارے کہ غٹ ءِ یکجا مرسا ملک ءِ اسہ وار ولدا دہشت گردی نا عفریت آن بچفوئی مریک۔ گورنر پنجاب پارے کہ ملک ءِ داوخت آ بے پناہ زرگزرانی چیلنج مون تروک ءِ۔ ملک انا زرگزران ءِ اسہ وار ولدا اول سرآن سوگو کروئی مریک۔ اوپارے کہ سیوتی حکومت وزیراعظم شہباز شریف نا کماشی ٹی داڑکن پبی کوشست کننگ اٹی ءُ۔
