راولپنڈی۔ 19 فروری (اے پی پی) پاکستان مسلم لیگ (ن) نا سینئر نائب صدر و چیف آرگنائزر مریم نواز پارینے کہ مسلم لیگ ن گچین کاری تیٹی بشخ ہلنگ کن پوروی تیاری اٹ میدان اٹی ساڑی ءِ، جیل بھرو تحریک نا دعویٰ کروک آ عدالت آتیان نرنگ اٹی ءِ، عمران خان لغور ءُ بند غ اسے دزگیری آن بچنگ کن زالبول و چناتے ڈھال کننگ و او ساڑی آ کبینی نا زموار ءِ، عمران خان آئی ایم ایف تون سخت شڑت طے کرسا ملک ءِ نسخان تسنے، حکومت ءِ قوم انا مشکل آتا احساس ارے، وزیراعظم محمد شہباز شریف ملکی حالیت آتے سہی کننگ کن دے و نن کوشست کننگ اٹی ءِ، میاں محمد نواز شریف مدام مشکل و تنکی تیٹی اختہ پاکستان ءِ شونداری نا کنڈا درے، تعلیم، جان جوڑی و سڑک آتا ڈٹ آک شاہدی ایترہ کہ میاں نواز شریف پنڈی نا الس تون مہرومریبت کیرہ۔ داخیال آتا درشانی ءِ او یک شنبے نادے آ راولپنڈی ٹی تنظیمی کنونشن آن تران کرسا کرے۔ داوخت آ بنجائی وزیر حوالکاری و شینکاری مریم اورنگزیب ، بنجائی وزیر داخلہ رانا ثناء اللہ، مسکوہی وزیراعظم شاہدخاقان عباسی ، سینئر راہشون پرویز رشید، طلال چوہدری ئسک ہم اوڑتون اوار ئسر، وخت اس کہ پاکستان مسلم لیگ ن نا راہشون ملک ابرار احمد ، چوہدری تنویر احمد، حنیف عباسی، طاہرہ اورنگزیب، دانیال تنویر چوہدری، راجہ حنیف، ملک افتخار، سجاد خان، لبنیٰ ریحان، راولپنڈی و چکلالہ کینٹ بورڈ انا باسک آک، پی ایم ایل شعبہ زالبول، طالب علم و ورناتنظیم تا راہشون، سوشل میڈیا ٹیم اتون اوار کارندہ غاک ریلی و جلسہ غاتا دورشم اٹ جلسہ گاہ غا سرمسر۔
