لاہور۔ 19 فروری (اے پی پی) وزیراعظم محمد شہباز شریف پاکستان نا انسانی ہمدردی و آسودہی تنظیم تے ترکیہ ٹی کمکی سرجز آتیا خراج تحسین پیش کرسا پارینے کہ پاکستانی انسانی ہمدردی نا تنظیمک ترکیہ و شام اٹی تینا مسلمان ایڑھ وایلم تا کمک اٹ لگوک ءُ۔ پاکستان نا خیراتی ادارہ غاک ترکیہ و شام اٹی کمکی سرجزآتیان مچ آ قوم انا کاٹم گمر اٹ بڑز کریر۔ وزیراعظم آفس میڈیا ونگ آن جاری بیان نا رداٹ وزیراعظم محمد شہباز شریف نا کماشی ٹی ترکیہ و شام انا زمی جمب آن زہمی تیکن پاکستان نا کنڈان برجا کمکی سرجز آتیا بڑزکو کہول انا دیوان یک شنبے نادے آ اڈ ہلک۔ دیوان اٹی پاکستان اٹی انسانی ہمدردی نا تنظیم ایدھی، سیلانی و الخدمت فاؤنڈیشن نا نمائندہ غاک ہم بشخ ہلکر۔ دیوان ءِ این ڈی ایم اے نا کنڈان ترکیہ وشام انا زمی جمب آن زہمی تیکن کمکی سرجزو کمکی گڑاتا فراوانی نا بابت سرجمی اٹ معلومدار کننگا۔ چیئرمین این ڈی ایم اے دیوان ءِ پارے کہ تدوک آ دے اٹی وزیراعظم نا پارت آتا رداٹ خیمہ ساز صنعت کار آتون سلابت کرسا فی تمبو نہاد و تمبو تا تیاری کن درکار وخت انا تعین ءِ کننگانے۔ بروک آ تُو انا ایسر اسکان حکومت پاکستان یخ آن بچفنگ نا اسہ لکھ تمبوتیار کرسا ترکیہ غا روانہ کیک۔ دا تمبو تے ترکیہ نا ڈیزاسٹر اینڈ ایمرجنسی مینجمنٹ پریذیڈنسی اے ایف اے ڈی آن موسمی گرج آتے مون آ تخسا تیار کننگ انگ ءِ۔
