اسلام آباد۔ 16 فروری (اے پی پی) وزیراعظم محمد شہباز شریف زمی جمب آن زہمی تتون یکجہتی کن 16 و 17 فروری آ ترکیہ نا دورہ ءِ کیک۔ پنچ شنبےنادے آ وزیراعظم آفس نا میڈیا ونگ آن جاری بیان نارداٹ انقرہ ٹی تینا اڈ کننگ نا وخت آ وزیراعظم ترکیہ نا صدر رجب طیب اردوان تون اوڑدہی کیک و زمی جمب آن قیمتی جون تا زیان آ ہڑزخواہی و بھلو کچ اسے آ مروک آ نسخان آ مچ آ پاکستانی قوم انا کنڈان ہمدردی نا درشانی ءِ کیک۔ وزیراعظم مشکل نا داساہت اٹی ترک الس تون ہم کوپہ سلنگ و برجا کمکی کوشست آتیٹی ہرممکن کمکاری ءِ برجاتخنگ نا پاکستان نا پکا عزم انا درشانی ءِ کیک۔ وزیراعظم سویلی ترکیہ ٹی زمی جمب آن زہمی علاقہ غاتا دورہ ءِ ہم کیک و علاقہ ٹی تعینات پاکستانی سرچ اینڈ ریسکیو ٹیم تتون اوار اوار زمی جمب آن زہمی تتون ہم گپ وتران کیک۔ سویلی ترکی ٹی بھسکار زمی جمب نا رداٹ، وزیراعظم 6 فروری آ صدر رجب طیب اردوان تون ٹیل فون آ ہیت کریسس و اودے ریسکیو و ریلیف نا کوشست آتیٹی ہرممکن کمک نا باوری کرفیسس۔ پاکستان نا کنڈان تینا ترک ایلم و ایڑھ تا کمک کن دوئی غٹ وسیلہ غاتے پورو وڑاٹ متحرک کننگانے۔ وزیراعظم ذاتی وڑاٹ کمکی سرجزآتا چاروکی ءِ کننگ اٹی ءِ۔ یات سلے کہ پاکستان و ترکی نا نیام اٹ ایلمی تعلقداری ءِ۔ ننا ہڑتوم آ ملک آک ہر آزمائشت و مصیبت اٹی اسہ ایلو تون ہم کوپہ سلیسنو۔ ترکیہ ٹی 6 فروری آ بھسکار زمی جمب آن ہزار آ بندغ آک زوال کریر۔
