اسلام آباد۔ 16 فروری (اے پی پی) وزیراعظم نا نمائندہ خصوصی بین المذاہب ہم آہنگی و دے ٹک نیامی امور حافظ محمد طاہر محمود اشرفی پارینے کہ پاکستان علماء کونسل نا عشرہ تاسیس 18 آن 28 فروری اسکان مچ آ ملک اٹی اڈتننگک، مارچ اٹی پیغام اسلام کانفرنس اس اڈتننگک، ملک و پیشن نا ملک بین المسالک ، بین المذاہب ہم آہنگی و رواداری کن تینا پبی کڑد ءِ ادا کننگ ءِ، ملک اتی سیاسی سوگوی نا گرج ءِ، گچین کاری تا بابت آئین و کانود آ عمل کروئی مریک۔ پنچ شنبےنادے آ داڑے پریس کانفرنس کرسا پاکستان علماء کونسل نا چیئرمین حافظ محمد طاہر محمود اشرفی پارے کہ بین المسالک و بین المذاہب ہم آہنگی قائم کننگ کن پاکستان علماء کونسل ءِ 1990ء ٹی ٹہیفنگا ہرانا یوم تاسیس (پگہ ) ہفتہ نا دے آ اڈتننگ انگ ءِ دا چرجوئی ٹی علماء کونسل مچ آملک اٹی 18 فروری آن 28 فروری اسکان عشرہ تاسیس اڈتننگ نا فیصلہ کرینے، ملک انا غٹ بھلا شار تیٹی عالم دین و مشائخ کنونشن و سیمینار اڈ ہلیک، مارچ اٹی پیغام اسلام کانفرنس اس اڈتننگک۔ اوپارے کہ پاکستان علماء کونسل گمر کیک کہ او دنیا اسلام نا اہم تحریک و جہانی جماعت آتا باسک ءِ، ملک و پیشن نا ملک بین المسالک ، بین المذاہب ہم آہنگی رواداری کن تینا پبی کڑد ءِ ادا کننگ اٹی ءِ ہراٹے غٹ امنا کیرہ۔ اوپارے کہ ساڑی حالیت آتا رداٹ نن 2022-23ء و 2023-24ء ٹی مقرر کروک آ ہدف آتیٹی ملک اٹی بین المسالک ، بین المذاہب ہم آہنگی و خلافت راشدہ نا طرز انا نظام کن جہد کننگ اوار ءِ۔ حافظ محمد طاہر محمود اشرفی پارے کہ نظام عدل اٹی اصلاحات نا گرج ءِ۔ اوپارے کہ گچین کاری تیان مست اول ضابطہ جوڑ مرے، پاکستان اٹی سیاسی سوگوی نا گرج ءِ، اسہ کنڈا دہشت گردی نا عفریت ءِ و ایلو کنڈا ملک انا تہہ ٹی سیاسی سرکڑدہ غاتا اواری اٹ تولپننگ اسہ سوج انا نشان اسے کہ نن ہرا کنڈا ہِننگ اُن۔ اوپارے کہ پیغام پاکستان اٹی غٹ مذہبی واکدارآک اسہ جاگہ غا تولر ۔
