اسلام آباد۔ 16 فروری (اے پی پی) وزیرخارجہ بلاول بھٹو زرداری 16 آن 20 فروری اسکان میونخ سیکورٹی کانفرنس اٹی بشخ ہلنگ کن جرمنی نا دورہ غاٹی ءِ۔ دفترخارجہ نا ترجمان ممتاز زہرا بلوچ پنچ شنبے نادے آ پریس حوال اٹی پارے کہ وزیر خارجہ سیکورٹی کانفرنس اٹی گول میز شرہ غاتون اوار چندی پروگرام تیٹی بشخ ہلیک۔ اوپارے کہ بلاول بھٹو زرداری تینا ہم منصب و کانفرنس اٹی شریک راہشون تتون ہڑتوم آ کنڈاتا اوڑدہی کیک۔ ترجمان پارے کہ وزیر خارجہ جرمنی نا دورہ غان پد لتھوانیا نا وزیر خارجہ نا سلہ غا سرکاری دورہ غالتھوانیا غا کاہک۔ وزیرخارجہ بلاول بھٹو زرداری 20 آن 21 فروری اسکان ولنیئس اٹی وزیر خارجہ گیبریلیس لینڈ سبرگس اتون گیشتر امور آ گپ وتران کیک و لتھوانیا نا پارلیمنٹ نا اسپیکر تون اوڑدہی کیک۔ ہڑتوم آ فریق ہڑتوم آ سیاسی سلابت نا قیام نا بابت مفاہمتی یات داشت آتیا ہم دستخط کیرہ۔ ترجمان پارے کہ تینا دورہ نا آخیریکو ریسہ ٹی وزیر خارجہ بلاول بھٹو زرداری 21 آن 22 فروری اسکان ہنگری نا دورہ ءِ کیک و ہنگری نا ہم منصب پیٹر سیجا رٹو تون گپ وتران کیک۔ گپ وتران اٹی فریق آک ہڑتوم آ کنڈآتا غٹ پلو آتیا سجفرہ و علاقائی و جہانی امور آ گپ وتران کیرہ۔ وزیر خارجہ غاک ہڑتوم آکنڈآتا کمکاری نا بابت مفاہمت نا اِرا یات داشت آتیا ہم دستخط کیرہ ہرافتیان اسہ سفارتی اکیڈمی تا نیام اٹ کمکاری و ارٹ میکو ہڑتوم آ ملک آتا نیام اٹ گوازی و تعلیم نا بابت مریک۔
