اسلام آباد۔ 16 فروری (اے پی پی) ترجمان دفترخارجہ پارینے کہ 6 فروری آ بروک آ زمی جمب نا رداٹ ترک الس تون یکجہتی و مخ تفی نا خصوصی درشانی ءِ کننگ کن وزیراعظم محمد شہباز شریف 16و 17 فروری آ ترکیہ نا دورہ ءِ کیک۔ دفترخارجہ نا ترجمان پنچ شنبے نادے آ داڑے جاری بیان اٹی پارے کہ انقرہ ٹی تینا اڈ کننگ نا وخت آ وزیراعظم ترکیہ نا صدر رجب طیب اردوان تون اوڑدہی کیک و زمی جمب آن قیمتی جون تا زیان و بھلو کچ اسے آ مروک آ نسخان تیا مچ آ پاکستانی قوم انا کنڈان جندی وڑاٹ ہڑزخواہی نا درشانی ءِ کیک۔ ترجمان نا رداٹ وزیراعظم مشکل نا داساہت اٹی ترک الس تون ہم کوپہ سلنگ و برجا کمکی کوشست آتیٹی ہرممکن کمکاری ءِ برجاتخنگ نا پاکستان نا پکا عزم انا درشانی ءِ کیک۔ بیان اٹی پاننگانے کہ وزیراعظم سویلی ترکیہ ٹی زمی جمب آن زہمی علاقہ غاتا دورہ ءِ ہم کیک و علاقہ ٹی تعینات پاکستانی سرچ اینڈ ریسکیو ٹیم تتون اوار اوار زمی جمب اٹی بچوک آتون ہم گپ وتران کیک۔ ترجمان دفترخارجہ نا رداٹ وزیراعظم سویلی ترکیہ ٹی بھسکار زمی جمب نا رداٹ 6 فروری آ ترک صدر رجب طیب اردوان تون گپ وتران کرسا اودے ریسکیو و ریلیف نا کوشست آتیکن ہرممکن کمکاری نا باوری کرفیسس۔ بیان نا رداٹ ترک ایلم و ایڑھ تا کمک کن غٹ دوئی وسیلہ غاتے پورو وڑاٹ متحرک کننگانے و وزیراعظم جندی وڑاٹ کمکی سرجزآتا چاروکی ءِ کننگ اٹی ءِ۔ پاکستان وترکیہ نا نیام اٹ برادرانہ تعلقداری ءِ و ہڑتوم آ ملک آک ہر آزمائشت و مصیبت اٹی اسہ ایلو تون ہم کوپہ سلیسنو۔
