اقوام متحدہ۔ 15 فروری (اے پی پی) پاکستان دیر انا گچین بست وبند کن زالبول آتا بریبر اوار مننگ نا گرج آ زور شاغسا پارینے کہ دیر انا کاختی نا گواچی ملک آتیٹی آبی رکھ انا دوئی کننگ کن دا حکمت عملی اہم ءِ۔ پاکستانی مندوب سینیٹر نسیمہ احسان اقوام متحدہ نا جنرل اسمبلی و انٹرپارلیمنٹری یونین (آئی پی یو) نا جوائنٹ انیشی ایٹو سالانہ پارلیمنٹری سماعت اٹی پارے کہ دا حکمت عملی ءِ سرسہب کننگ کن غٹ آن مست و غٹ آن اہم زالبول آتون اوار غٹ صارف و اسٹیک ہولڈر آتے دیر انا بست وبند و آبپاشی نا پروگرام تا تیاری ٹی اوار کننگے۔ پاکستانی مندوب سینیٹر نسیمہ احسان اردو ٹی تران کرے ہرادے اقوام متحدہ ٹی پاکستانی مشن نا مترجم انگریزی ٹی ترجمہ کرے و اودے اسہ وخت اٹی اقوام متحدہ نا 5 ایلو سرکاری بولی فرانسیسی، ہسپانوی، عربی، چینی و روسی بولی تیٹی پیش کننگا۔ پاکستانی مندوب ’’زیات جوان آبی پالیسی نا کنڈا کسر‘‘ کس اسے پدی ہلپرسا ‘‘ نا سرحال آ گپ وتران اٹی پارے کہ اگہ نن پائیدار شونداری نا ہدف آتا غٹ اکن ساف دیر و سفائی نا شش می ہدف ءِ دوئی کننگ خوانہ تو نن دیر انا بست وبند نا غٹ کہول آتیا زالبول ، ورنا و ہندی کمیونٹی تا بریبر نمائندگی نا گرج ءِ امنا کین۔ نسیمہ احسان پارے کہ پاکستان ترندی اٹ ’’دیر انا کمتی‘‘ والا ملک اس جوڑ مرسا کننگ ءِ و حکومت دا چیلنج تون مون تننگ کن اسہ پالیسی اس مون آ ایسونے۔ اوپارے کہ دیر انا دا تنکی پاکستان نا غٹ شاری تا دیر اسکان بریبر و اڑزان رسینگ تون اوار اوار کُننگ نا ساف دِیر و سفائی نا جوان آسراتی اسکان رسینگ نا حقءِ پک کیک۔ پاکستانی مندوب پارے کہ حکومت نا ’’مربوط آبی وسیلہ نا بست وبند‘‘ نا ساڑی حکمت عملی دیر انا بنداوی پنجر و انتظامی نظام ءِ زیات گچین و پائیدار جوڑ کننگ کن جوان پالیسی گام گیج ، ادارہ جاتی اصلاحات ، و علم آ تالان مداخلت آتے درستی راستی کرفنگ نا گرج ءِ امنا کرے۔ اوپارے کہ 2018 نا سندھ واٹر مینجمنٹ (ترمیمی( ایکٹ صوبائی آبی ادارہ غاتیٹی زالبول آتا نمائندگی نا ضمانت ایتک ہرا دیر انا بابت جوان گورننس نا کنڈا اسہ اہم ءُ گام اسے۔
