اسلام آباد۔ 14 فروری (اے پی پی) وزیر خارجہ بلاول بھٹو زرداری پارینے کہ ننا فارن سروس آفیسر آک مچ آدنیاٹی پاکستان نا موقف ءِ گچین وڑاٹ پیش کرینو، چاگڑدی بدلی تا بابت موقف آ مچ آ دنیا پاکستان تون سلیس، جنیوا ٹی کلائیمیٹ ریزیلیئنٹ پاکستان کانفرنس نا وخت آ جہانی برادری ننتون پبی تفے، مشکل وخت اٹی دنیا تون تفنگ ننا گچین خارجہ پالیسی نا شاہدی ءِ۔ داخیال آتا درشانی ءِ او سے شنبےنادے آ داڑے فارن سروس اکیڈمی ٹی ’’24 می سپیشلائزڈ ڈپلومیٹک گریجوایشن کورس‘‘ نا دود اٹی بطور مہمان خاص تران کرسا کرے۔ وزیر خارجہ پارے کہ پاکستان چاگڑدی بدلی تا بابت ہر فورم آ توار بڑزکرے و مچ آ دنیا پاکستان تون سلیس۔ اوپارے کہ پاکستان نا خارجہ پالیسی ءِ ملکی مفاد نا رداٹ مرتب کینہ ننے خارجہ پالیسی تون اوار اوار ہر پڑاٹی پوسکن آ ٹیکنالوجی نا کاریم اٹ اتنگ ءِ مون آ دروئی مریک۔ بلاول بھٹو زرداری پارے کہ پاکستان اٹی تدوک آ سال بروک آ است ہسون نوکاپ آن پد چین و امریکہ تون اوار چندی ملک آک ننا پبی کمک ءِ کریر اوکان پد جنیوا ٹی چاگڑدی بدلی تا بابت کلائیمیٹ ریزیلیئنٹ پاکستان کانفرنس نا وخت آ دنیا ننتون پبی تفے۔ اوپارے کہ پاکستان چاگڑدی بدلی تا بابت ہر فورم آ توار بڑز کرے، خارجہ پالیسی ءِ ملکی مفاد نا رداٹ مرتب کینہ۔ وزیرخارجہ پارے کہ کنا دود اٹی بشخ ہلنگ شرفمندی نا سوب ءِ۔ اوورناسفارتکار آتے کورس انا پوروی آ مبارکبادی تس۔ اوپارے کہ ڈائریکٹر جنرل فارن سروس اکیڈمی و اوفتا ٹیم ہم مبارکباد نا حقدار ءِ، ہرافک کورس انا اڈتننگ اٹ اہم ءُ کڑ د اس ادا کریر۔ وزیرخارجہ پارے کہ فارن سروس اکیڈمی جہانی آب انا سفارتکار تیار کرینے ، فارن سروس اکیڈمی ٹی پاکستان آن بیدس سنگت ملک آتا سفارتکار آتے ہم تربیت تننگ انگ ءِ۔ اوپارے کہ پاکستان ملکی و جہانی کہول آ مشکل آتیان پد ہم مون آ ہِننگ ءِ ، سیوتی حکومت تینا چنکو وخت اسے ٹی سرسہبی تے دوئی کرینے ہرافتے ٹی ایف اے ٹی ایف نا گرے لسٹ آن پاکستان نا پیش تمنگ آن بیدس کوپ۔ 27 اٹی سرسہبی اتون چاگڑدی بدلی تا بابت ہدف آتا دوئی کننگ آن بیدس پاکستان ءِ جی 77 پلس چائنا گروپ نا سروکی نا شرفمندی ہم دوئی مس۔ اوپارے کہ ساڑی حکومت غٹ جہانی پارٹنر آتون تعلقداری تے مون آ درے وخت اس کہ جنیوا ٹی کلائیمیٹ ریزیلیئنٹ پاکستان کانفرنس نا اڈتننگ پاکستان نا سرسہب خارجہ پالیسی نا درور اسے۔ وزیرخارجہ فارن سروس اکیڈمی آن تربیت دوئی کروک آآفیسر و ایلو بشخ ہلوک آتے جیو پالیٹکس ، یوکرین نا جھیڑہ و دنیاءِ داوخت آ مون تروک ویل آتون اوار اوار مخلوط حکومت نا سرسہبی تا بارواٹی معلومدار کرے۔ اوپارے کہ تدوک آ سال است ہسون نوکاپ نا سوب آن دے ٹک آن ہلیس دیکی اسکان دنیا پاکستان تون سلیس، امریکہ و چین ہم مشکل وخت اٹی پاکستان تون تفیر، دے ٹک نیامی نا ملک آتون اوار اسلامی ملک و یورپی یونین آن بیدس آسیان ملک آک ہم پاکستان تون تفیر ہرا ملک انا خارجہ پالیسی نا سرسہبی ءِ۔ اوپارے کہ کم وسیلہ و زیات خواری اٹ پاکستان نا سفارتکار آک تینا لائخی تے منفینو۔ اوداہیت آ زور شاغا کہ ننے پوسکن آ کمیونیکیشن ٹیکنالوجی ءِ تینا کروئی مریک وخت اس کہ فارن سروس ءِ پوسکن آ خواست آتون ہم گرنچ کننگ تون اوار اوار ایکسپورٹ مارکیٹ ءِ پٹنگ نا ہم گرج ءِ۔ فارن سروس ءِ انتظامی و ایلو بشخ آتیٹی گچین جوڑ کننگ وخت انا خواست ءِ، پاکستان نا سفارت کار آتے پرنٹ و الیکٹرانک میڈیا تون سوشل میڈیا تون ہم ہم گرنچ کننگ نا گرج ءِ۔ وزیر خارجہ پارے کہ فارن سروس اکیڈمی ٹی ورناسفارتکار آتا تربیت نا پوروی آن پد اسہ سفر اس چٹانے وخت اس کہ اوفتے کن اسہ پوسکن ءُ سفر اس بناکرینے۔ وزیر خارجہ داگمان نا درشانی ءِ کرے کہ فارن سروس اکیڈمی دُن ءُ پوسکن ءُ گریجویٹ تیار کیک ہرا ہر لحاظ اٹ قابل مریرہ۔ دود انا ایسر آ وزیرخارجہ بلاول بھٹو زرداری فارن سروس اکیڈمی آن فارغ مروک آ گریجویٹ آتیٹی سند و میڈل بشخا۔ داکان مست فارن سروس اکیڈمی نا ڈائریکٹر جنرل اکیڈمی آ بننگ آ وزیرخارجہ و ایلو مہمان تے بخیر کرسا اوفتا منت واری ءِ ہرفے۔ اوپارے کہ پاکستان نا وزارت خارجہ نا آفیسر آتا تربیت کن دا ادارہ اہم خذمت سرتننگ ءِ و پوسکن آ گریجویٹ آتیکن ہیلکاری پروگرام بھاز اہمیت تخک۔ اینو نا پروگرام اٹی 21 گریجویٹ آتے سند تننگ انگ ءِ۔ اوپارے کہ ادارہ ءِ آخبت نا خواست آتون ہم گرنچ کننگ کن گام گیج کننگ انگ ءِ۔
