اسلام آباد۔ 14 فروری (اے پی پی) اسپیکر قومی اسمبلی راجہ پرویز اشرف تون سے شنبے نادے آ آئیوری کوسٹ انا ہم منصب ادامابکٹو گوپارلیمانی ڈل اتون اوار پارلیمنٹ ہاؤس اٹی اوڑدہی کرے۔ اوڑدہی ٹی ہڑتوم آ کنڈآتا تعلقداری تون اوار تین پہ تینی است خواہی نا ایلو امور تیا گپ وتران کننگا۔ اسپیکر داوخت آ گپ وتران کرسا پارے کہ آئیوری کوسٹ افریقہ نا اسہ اہم ءُ ملک اسے، پاکستان آئیوری کوسٹ تون ہڑتوم آ کنڈآتا تعلقداری تے مون آ دننگ نا خواہندار ءِ، ہڑتوم آ ملک آتا نیام اٹ پارلیمانی رابطہ غاتا مون آ دننگ المی ءِ، پاکستان و آئیوری کوسٹ نا نیام اٹ پارلیمانی سنگتی گروپ نا جوڑ کننگ المی ءِ۔ اوپارے کہ پارلیمانی رابطہ غاتا مون آ دننگ آن ہڑتوم آ ملک آتا پارلیمنٹ نا باسک آتے اسہ ایلو نا آزموندہ غاتیان فائدہ ہرفنگ نا موقع ملک، پاکستان ہم آئیوری کوسٹ آنبار اسہ کشاری ءُ ملک اسے، پاکستان اٹی واپار و زرکاری نا بے پناہ وارخواہی ارے، آئیوری کوسٹ نا پارلیمانی ڈل انا دورہ غان ہڑتوم آ ملک آتا الس پین خڑک بریک۔ آئیوری کوسٹ نا دورہ نا سلہ کنکن خوشی نا سوب ءِ۔ داوخت آ آئیوری کوسٹ نا اسپیکر راجہ پرویز اشرف نا آئیوری کوسٹ نا بابت تاثرآتا ستاءِ کرے و پارے کہ آئیوری کوسٹ نا پارلیمانی ڈل پاکستان نا دورہ ءِ کرسا بھاز خوشی محسوس کننگ اٹی ءِ۔ اوفتے پاکستان نا الس آن بے پناہ مہرومریبت و خلوص ملانے، پاکستان اٹی جفاکش و خواری کروک آ الس رہینگک۔ پاکستان آ بننگ آ جم و جوش اٹ بخیر و مہر ومریبت ءِ اسُل است آن دپنہ۔ اوپارے کہ کمیونیکیشن نا دنیا ٹی پاکستان نا برخلاف تاثر من گھڑت و سٹی ءِ، دا دورہ غان ننے درک مس کہ پاکستان اسہ عظیم ءُ ملک اسے۔ اومستی پارے کہ ننا ملک پاکستان تون ہڑتوم آ کنڈآتا تعلقداری تے پین ودفنگ خواہک۔ آئیوری کوسٹ اسہ کشاری ءُ ملک اسے و اونا شونداری نا دارومدار کشت وکشار آٹے۔ پارلیمانی رابطہ غاتا مون آ دننگ بھاز اہمیت تخک۔ پاکستان و آئیوری کوسٹ نا نیام اٹ سنگتی ٹولی نا جوڑ کننگ اسہ اہم ءُ پیش رفت اس مریک ۔ آئیوری کوسٹ نا اسپیکر تینا پاکستانی ہم منصب ءِ پارلیمانی ڈل اتون اوار آئیوری کوسٹ نا دورہ ءِ کننگ نا سلہ ہم خلک۔ داوخت آ ہڑتوم آ ملک آتا نیام اٹ پارلیمانی سنگتی ٹولی نا جوڑ کننگ کن مفاہمت نا یات داشت آتیا دستخط کننگا۔ آئیوری کوسٹ نا اسپیکر پاکستان نا قومی اسمبلی ٹی مہمان تیکن تخوک آ کتاب اٹی تینا تاثرآتے ہم نوشتہ کرے۔
