اسلام آباد۔ 13 فروری (اے پی پی) بنجائی وزیر قومی جان جوڑی عبدالقادر پٹیل پارینے کہ لاہور نا چاگڑدی وڑتیٹی پولیو دین انا پک مننگ آن پد ملک انا 39 ضلع غاتیٹی پنچ سال آن کم وئی نا 60 لکھ آن زیات چناتے پولیو آن بچفنگ نا پڑی کنفنگ نا مہم نا بناءِ کننگانے، لمہ و باوہ تینا 5 سال آن کم وئی چناتے معذوری آن بچفنگ کن ہرپولیو مہم اٹی ویکسین ضرور کنفر۔ دوشنبےنادے آ وزارت جان جوڑی آن جاری بیان نا رداٹ بنجائی وزیر جان جوڑی پارے کہ خصوصی پولیو مہم 13 آن 17 فروری اسکان نہہ ضلع غاتیٹی پورو وڑاٹ چلیفنگک ہرافتے ٹی سویلی خیبرپختونخوا نا ہفت ضلع ، بنوں ، ڈی آئی خان، لکی مروت، قطبی وزیرستان ، بڑزکو سویلی وزیرستان و زیریں سویلی وزیرستان، و پنجاب نا اِرا ضلع لاہور و فیصل آباد اوار ءُ۔ ملک انا 30 ضلع غاتیٹی جزوی مہم چلیفنگک ہرافتے ٹی شیخوپورہ نا گچین مروک آ یونین کونسلز، اوغانستان نا سیم اتون کیبی 57 یونین کونسلز، اوغان باہوٹ آتا کیمپ والا 58 یونین کونسلز، و ملتان نا 107 یونین کونسلز اوار ءُ ہراڑے چناتے پولیو نا پڑی کُنفنگک۔ دا مہم جنوری ٹی لاہور نا اِرا جتا ہند آتیان ہلوک آ اِرا چاگڑدی وڑتیٹی پولیو دین نا پک مننگ آں پد اڈتننگ انگ ءِ۔ وزیر جان جوڑی عبدالقادر پٹیل پارے کہ چاگڑدی وڑتیٹی او دین نا ساڑی گری ہرا اوغانستان یا سویلی خیبرپختونخوا ٹی دین اتون گنڈوک ءِ داہیت انا شاہدی ءِ کہ دین مخلوق تون اسہ جاگہ غان ایلو جاگہ غا منتقل مننگ ءِ و ایلو علاقہ غاتیٹی تالان مننگ ءِ۔ سیم انا ہرپارآن پولیو دین ہڑتوم آ ملک آتا چناتیکن خطرہ اسے۔ بیرہ پولیو ویکسین نا چندی خور مچ آ زند انا رکھ فراوان کننگ کیک۔ ننا فرنٹ لائن ورکرز اخس وار ضروری مرے ویکسین نما درگہ غا اتسا کیرہ۔ لمہ و باوہ داہیت ءِ پک کیر کہ چناک دا رکھی پڑی تے ہلیر و رکھ مریر۔
