دامشکل وخت اٹ ترک ایلم تا کمک آن ہچ پدی توپنہ تینے، محمد شہباز شریف

لاہور۔ 10 فروری (اے پی پی) وزیراعظم محمد شہباز شریف پارینے کہ پاکستان دا مشکل وخت اٹ ترک ایلم تا کمک کن ہچ پدی توپک تینے۔ داحالیت آتے ٹی ترکیہ ءِ اسُل تنیا الیپنہ، ترکیہ نا الس تون ہمدردی نا درشانی ءِ کینہ، اومیت کینہ ترکیہ زوت دا مشکل آن پیش تمک۔ داخیا ل آتا درشانی ءِ او جمعہ نادے آ ترکیہ نا زمی جمب آن زہمی تیکن کمکی گڑا تا روانہ کننگ نا وکت آ لاہور بالی پٹ آ گپ وتران کرسا کرے۔ داوخت آ نگران وزیراعلیٰ پنجاب محسن نقوی ، ترکیہ نا قونصل جنرل و این ڈی ایم اے نا چیئرمین ئسک ہم ساڑی ئسر۔ وزیراعظم محمد شہباز شریف پارے کہ زمی جمب آن ترکیہ و شام اٹی ہزار آ قیمتی جان تے نسخان مس ، ننا ایلم ملک ترکیہ و شام اٹی است ہسون زمی جمب ہرا بھسکاری تے کرے ہراڑان ہزار آ مخلوق ہرافتے ٹی بزرگ، ایڑھ، ایلم و چناک اوار ئسر اللہ ءِ پیارا مسنو و لکھ آ مخلوق بے اُرا مسنے وخت اس  کہ ہزار آ مخلوق ٹھپی ءُ، مخلوق بے سرو سامانی نا حالیت اٹی تینا دوست آتے پٹنگ اٹی ءُ۔ اوپارے کہ داخہ در بھسکاری ساڑی آ دور اٹی ننا خنک اسُل خنتنو، ترکیہ و شام اٹی ہر کنڈا است ہسون ندارہ خننگک، ننے پورو اومیت ءِ کہ ترکیہ نا الس تینا لیڈر صدر طیب اردگان نا کماشی ٹی دا مشکل حالیت آتیان ضرور پیش تمرہ و ہندا رداٹ شام انا الس ہم دلیری اٹ حالیت آتا مقابلہ ءِ کرسا مشکل آتیان پیش تمرہ۔ وزیراعظم پارے کہ داوخت آ پاکستان نا 22 کروڑ الس ترکی نا ایڑھ و ایلم تتون تفوک ءُ و اوفتا غم اٹی بریبر نا شریک ءُ، ترکیہ ٹی زمی جمب آن پد ای دمدستی وڑاٹ ترک صدر رجب طیب اردگان ءِ فون کریٹ و پاریٹ پاکستان نا الس نمتون ہم کوپہ سلوک ءِ، و اودے ہروڑنا کمک نا باوری کرفین، پاکستان  ترکیہ ءِ وخت اس ہم داحالیت آتیٹی تنیا الیپک۔ محمد شہباز شریف پارے کہ پاکستان نا ترکیہ تون بھاز دیرینہ تعلقداری ءِ، پاکستان اٹی 2005 نا زمی جمب اٹی کم و ود اسہ لکھ بندغ زوال کریر و ہرکنڈا بھسکاری ئسک وخت ا س کہ 2010 نا بدترین نوکاپ اٹی ترکی نا صدر طیب اردگان تینٹ پاکستان آ بس و اوڑتون اوار اونا اُرائی ہم ئسک، دا نوکاپ اٹی ترکیہ پاکستان اٹی خلق انا خلق جوڑ کرے و پوسکن ءُ ہسپتال جوڑ کرے و ترکی نا الس و صدر ہمووخت اسکان رابطہ ءِ برقرار تخار ہراتم اسکان پاکستان ناآخیریکو بندغ تینا اُراٹی دُوارہ بحال متو، ہمووخت آ ترکیہ نا خاتون اول ترکی نا سخی و پوریاگر آتیان پاکستان نا مالی امداد کن خواست کرے و تینا قیمتی ہار ءِ ہم عطیہ نا وڑاٹ پیش کرے۔ اوپارے کہ ساڑی آ زمی جمب اٹی پاکستانی حکومت و الس ترک ایلم تتون ہم کوپہ سلوک ءُ و نن تینا وسیلہ غاتے ٹی رہینگسا ترکی الس نا ہرممکن کمک ءِ کینہ محمد شہباز شریف پارے کہ ساڑی آ نوکاپ اٹی ہم ترکیہ پاکستان نا پبی کمک ءِ کرے و ننے ہم ترکیہ و شام انا ایلم تا امداد ءِ برجاتخوئی ءِ۔ ہرادے ترکیہ ٹی زمی جمب بس ہمودے تینا ایلم تا امداد کن پاکستان آرمی و ریسکیو نا ٹیم تے روانہ کننگا۔ محمد شہباز شریف پارے کہ ترند یخ انا سوب آن ترکیہ نا الس ءِ باسن ءُ پُچ و کٹ آتا سخت گرج ءِ۔ پاکستان آن سد ٹن کمکی گڑا ترکیہ غا گدریفنگ انگ ءِ وخت اس  کہ جم وڑاٹ 142 ٹن کمکی گڑا ترکیہ غا گدریفنگک ، ترکیہ و شام اٹی بروک آ زمی جمب آن مروک آ بھسکاری ءِ تدوک آ سد سال اٹی ہم خنتنون، ترکیہ و شام اٹی مخلوق تینا دوست آتے پٹنگ اٹی ءُ ، ننا دعاک و ہمدردیک ترکیہ الس تون ءُ۔ اوپارے کہ ایلم ملک ترکیہ وشام اٹی بھلو است ہسون زمی جمب اس بس، ہراڑان ہزار آ قیمتی جون تا نسخان مس، پاکستانی الس ترک ایلم تا دا ڈکھیائی ٹی بریبر نا شریک ءِ، و دا مشکل ساہت اٹی ترکیہ نا الس تون ہروڑنا امداد کننگ کن تیار ءُ، ریسکیو ٹیم تا کنڈان زندہ بچوک آ تا پٹنگ نا چرجوئی برجاءِ، پاکستان نا ہر ضلع ٹی تینا ایلم ملک ترکیہ و شام انا امداد کن عطیہ جمع کننگ کن سینٹر جوڑ کننگ انگ ءِ و مچ آ ملک انا غٹ تعلیمی دارہ غاتیٹی ہم عطیہ جمع کننگک، پاکستان آرمی و ریسکیو نا ٹیمک ترکیہ غا سرمسنو۔ محمد شہباز شریف پارے کہ ترکیہ ٹی زمی جمب آن پد اٹی ترک صدر طیب اردگان ءِ فون کریٹ و ہروڑنا کمک نا باوری کرفیٹ کہ پاکستان ترکیہ ءِ وخت اس ہم داحالیت آتیٹی تنیا اِلیپک، جمعتہ المبارک نا مبارک دے انا وخت آ ترکی نا الس نا ہرافک دنیا ءِ اِلانو اوفتے کن بخشش نا دعا کننگے و عطیہ غاتا خواست کننگے۔ اوپارے کہ پاکستان نا کنڈان ترکیہ نا امداد نا چرجوئی ہڑدے برجاسلک۔ او الس، پوریاگر و آسودہی ادارہ غاتیان امداد تننگ کن زیات آن زیات بشخ ہلنگ نا خواست کرے۔ داوخت آ ترکیہ قونصل جنرل پاکستانی حکومت و الس نا ترکیہ تون یکجہتی نا درشانی ءِ کننگ نا ستاءِ کرے و پارے کہ ہڑتوم آ ملک آتا اسہ ایلو نا تعلقداری سوگوبنداوتیاٹی ءُ۔