امریکہ، سفیر مسعود خان نا ترک الس تون یکجہتی نا درشانی ءِ کننگ کن ترکیہ نا سفارت خانہ نا دورہ، ہڑزخواہی کتاب اٹی تینا تاثرآ تے نوشتہ کرے

واشنگٹن۔ 10 فروری (اے پی پی) امریکہ ٹی پاکستان نا سفیر مسعود خان بھسکاری زمی جمب آن پد ترک الس تون یکجہتی نا درشانی ءِ کننگ کن ترک سفارت خانہ نا دورہ ءِ کرے۔ پاکستانی سفارت خانہ نا کنڈان جاری پریس ریلیز نا رداٹ ترک سفیر حسن مورت مرکن تینا پاکستانی ہم منصب ءِ ترکیہ نا آفت زدہ علاقہ غاتا تازہ انگا حالیت آتیان معلومدار کرے۔ اوپاکستانی الس و امریکہ ٹی رہینگوک آ پاکستانی تا جوزہ و است بھلنی نا ستا ءِ کرے۔ داوخت آ پاکستانی سفیر مسعود خان زمی جمب نا سوب آن بھلو کچ اسے آ مروک آ نسخان تیا ہڑزخواہی و ہمدردی نا درشانی ءِ کرے۔ پاکستانی سفیر 2005 اٹی پاکستان اٹی بروک آ زمی جمب اٹی ترکیہ نا امداد خاص وڑاٹ ریلیف و ریسکیو سرجز و مظفرآباد ، بالاکوٹ و باغ انا پوسکن تفنگ اٹی کروک آ کمکاری ءِ یات کرسا پارے کہ پاکستانی الس نا ذہن تیٹی ترک ایلم تا فراخدلی اینو ہم تازہ ءِ۔ سفیر پارے کہ نن مشکل نا داساہت اٹی تینا ترک ایلم تا ہرممکن کمک ءِ کینہ۔ پاکستانی سفیر ءِ ترکی نا سفارت خانہ نا  ہموجاگہ غا ہم دننگا ہراڑے سخی، سول سوسائٹی، ترک باتی، مسلمان و ایلو کمیونٹی تا کنڈان کمکی گڑا یکجا و زہمی علاقہ غاتیٹی گدریفنگ انگ ءِ۔ پاکستانی سفیر زمی جمب آن پد ترک سفارت خانہ ٹی ہڑزخواہی کتاب اٹی تینا تاثر آتے نوشتہ کرسا نوشتہ کرے کہ دا بیرہ ترک الس کن آخا بلکن مچ آپاکستانی قوم و حقیقت اٹ مچ آ انسانیت کن المیہ اسے۔ اوپارے کہ نن دا بھسکاری آ افسردہ و آبدیدہ اُن و تینا است ہسونی نا درشانی ءِ کننگ کن اودے لوز ملپننگ ءِ۔