حکومت آئی ایم ایف پروگرام نا نفاذ اٹی سنبرینگوک ءِ، 170 ارب روپئی نا پوسکن ءُ خراج خلنگک، وزیرخزانہ سینیٹر محمد اسحاق ڈار

اسلام آباد۔ 10 فروری (اے پی پی) بنجائی وزیر خزانہ و محصولات سینیٹر محمد اسحاق ڈار پارینے کہ آئی ایم ایف مشن اتون گپ وتران پورو مسنے، حکومت آئی ایم ایف پروگرام نا نفاذ اٹی سنبرینگوک ءِ، 170 ارب روپئی نا پوسکن ءُ خراج خلنگک، توانائی نا بشخ اٹی اصلاحات آ عمل درآمد مریک، گیس و توانائی نا بشخ اٹی گردشی وام تیٹی پین ودکی کننگپک، غیر ہدفی زرتلافی تے چٹفنگک، بے نظیر انکم سپورٹ پروگرام نا بجٹ اٹی 30 جون اسکان 40 ارب روپئی نا ودکی کننگک، پیٹرولیم مصنوعات آ سیلز خراج نا اطلاق مفک۔ جمعہ نادے آداڑے آئی ایم ایف مشن نا دورہ ءِ پاکستان نا ایسر آ میڈیا ءِ حوال ترسا وزیرخزانہ پارے کہ پی ٹی آئی نا مسکوہی حکومت آئی ایم ایف تون پروگرام نا بناءِ کریسس و ساڑی حکومت سخت عزم اتون اودے مون آ درسا ہِننگ ءِ، مخلوط حکومت داپروگرام نا نفاذ اٹی سنبرینگوک ءِ انتئے کہ دا معاہدہ پاکستان نا حکومت کریسس۔ وزیرخزانہ پارے کہ پاکستان و آئی ایم ایف نا نیام اٹ 10 دے مروک آ گپ وتران اٹی بجلی، توانائی تون اوار چندی بشخ آتا احاطہ ءِ کننگا، مذاکرات اٹی پیٹرولیم ڈویژن، ایف بی آر، پاور ڈویژن تون اوار تعلقدار بشخ آتا نمائندہ غاک اوار ئسر ہرافک گپ وتران نا ٹک آتے گڈیکو دروشم اس تسر ، اوکان پد روایت نا رداٹ وزیراعظم تون خیرخواہی اوڑدہی اس طے کننگا، وزیراعظم دُن تو لاہور اٹی ئسک تو زوم انا کمک اٹ دا میٹنگ مس، وزیراعظم پارے کہ ہرا گڑاک طے مسنو اوفتیا عملدرآمد مریک، وزیراعظم نا پاننگ ئس کہ پاکستان دا بابت سنبرینگوک ءِ، پاکستانءِ میمورنڈم آف اکنامکس اینڈ فنانشل پالیسیز (ایم ای ایف پی ) ملانے، ہراڑ ادوشنبےنادے آن گپ وتران بناکیک، اوکان پد لیٹر آف انٹینٹ جاری مریک اوکان پد آئی ایم ایف نا انتظامی بورڈ اسٹاف لیول معاہدہ نا منظوری ءِ ایتک۔ وزیرخزانہ پارے کہ ہرا بشخ آتیا گپ وتران مسنے ہمو بشخ آتیٹی اصلاحات  پاکستان نا تینا فائدہ ٹی ءِ، اگہ نن دا اصلاحات آتے کتون تو ننا زرگزران شون ہلپک، مسکوہی حکومت دا اصلاحات آتے کپرسا زرگزران نا بیڑا ءِ غرق کریسس و دنیا نا 24 می بھلا زرگزران ءِ 47 می نمبر آ سرکریسس، بجلی نا بشخ اٹی پیدواری خڑچ آتا کچ 3 ہزار ارب روپئی ءِ وخت اس کہ 1800 ارب نا ریکوری ءِ ہنداخاطران دا بشخ اٹی اصلاحات المی ءِ۔ وزیرخزانہ پارے کہ 2013ٹی پاکستان مسلم لیگ ن نا حکومت اولیکو بجٹ اٹی 16،17 اصلاحات درستی راستی کرفے، آئی ایم ایف تون ساڑی آ گپ وتران کن نن تیار ئسن و داڑا ای حکومت نا زرگزرانی ٹیم ءِ مبارکبادی ایتیوہ، دا مذاکرات اٹی ایف بی آر، پاور، پیٹرولیم ڈویژن و بے نظیر انکم سپورٹ پروگرام نا نمائندہ غاک اہم ءُ کڑد اس ادا کریر، داوخت آ ہچ ءُ ابہام اس اف، نن غٹ قول آتے پورو کینہ و ہراوڑ 2013-18نا آئی ایم ایف پروگرام ءِ پورو کریسن، ہموجوزہ اتون ساڑی آ پروگرام ءِ پورو کننگک۔ وزیر خزانہ پارے کہ آئی ایم ایف بورڈ انا منظوری آن پد پاکستان ءِ 1.2 ارب ڈالر نا قسط ملک۔ وزیرخزانہ پارے کہ آئی ایم ایف تون ہرا امور تے گڈیکو دروشم اس تننگانے اوفتا رداٹ 170 ارب روپئی نا پوسکن ءُ خراج خلنگک ولے داہیت ءِ پک کننگک کہ دانا بھاریم براہ راست لس بندغ آ تمپ، توانائی نا بشخ اٹی اصلاحات آ عملدرآمد مریک، گیس و توانائی نا بشخ اٹی گردشی وام تیٹی پین ودکی کننگپک، غیر ہدفی زرتلافی ءِ چٹفنگک، گیس انا بشخ اٹی پین گردشی وام تا ودکی کننگپک، دا غٹ ہندن ءُ امور ءُ ہرافتیا عملدرآمد ننا جند انا فائدہ ٹی ءِ۔ وزیرخزانہ پارے کہ راج انازرگزرانی وڑاٹ نزور تپہ غاتیکن 30 جون اسکان بے نظیر انکم سپورٹ پروگرام نا بجٹ اٹی پین 40 ارب روپئی نا ودکی کننگک و بی آئی ایس پی نا بجٹ ءِ 400 ارب روپئی اسکان سرکننگک۔ وزیرخزانہ پارے کہ نن حساب و کتاب آ امنا کرینن و بنائی گپ وتران آن پد دا گام گیج آتیکن منی فنانس بل اس درستی راستی کرفنگک۔ وزیرخزانہ پارے کہ پاکستان نا سنگت ملک آک ہم تینا قول آتیا عملدرآمد کیرہ، ہنداخاطران زرمبادلہ نا کوڑی تا بابت بایدے مایوس مننگپ، جوہری دھماکہ غاتیان پد پاکستان 400 ملین ڈالر نا زرمبادلہ نا کوڑی تیا ہم گزارہ کریسس، اسٹیٹ بینک دا بابت گام گیج کننگ ءِ۔ اسہ سوج اسے آ وزیر خزانہ پارے کہ نجکاری نا عمل آن ٹریک ءِ، وزیراعظم تینٹ تدوک آ ہفتہ اِرامسہ میٹنگ کرینے۔ اوپارے کہ پیٹرولیم مصنوعات آتیا خراج ٹیکس انا شڑت ءِ نن امنا کتون، و آئی ایم ایف ٹیم ہم دا شڑت آتے پدی ہلکنے۔ وزیرخزانہ پارے کہ پاکستان ڈیفالٹ مفک، ای وخت اس ہم ڈیفالٹ نا ہیت ءِ کتنوٹ، ہرا فک داہیت آتے کننگ اٹی  ءُ او پاکستان ءِ بدنام کننگ اٹی ءُ، اگہ ملک اسے نا وزیراعظم پاکستان آن پیشن ہنسا پائے کہ پاکستان وام تیٹی ڈبنگانے و ملک اٹی کرپشن ءِ تو داوڑنا ملک اٹی دیر اس زرکاری کن بریک؟۔