انٹرنیشنل پارلیمنٹرینز کانگریس کن پاکستان مثبت و تعمیری کڑ د ادا کرینے، چیئرمین سینیٹ محمد صادق سنجرانی

اسلام آباد۔ 08 فروری (اے پی پی) چیئرمین سینیٹ محمد صادق سنجرانی پارینے کہ انٹرنیشنل پارلیمنٹرینز کانگریس کن پاکستان مثبت و تعمیری کڑد ادا کرینے، مچ آ دنیا نا پارلیمنٹ نا باسک آک دا پلیٹ فارم نا کمک اٹ امن اٹی اہم ءُ کڑد اس ادا کننگ کیرہ، ٹرانسپورٹ، جان جوڑی، تعلیم و ایلو بشخ آتیٹی گچینی کن اجتماعی کوشست کروئی مریک، ہرسال ٹریفک شکست آتیٹی 1.3 ملین بندغ زوال و 50 ملین ناخڑک ٹھپی مریرہ، 90 درسد آن زیات مرک آک کم و اوسط کٹیا والا ملک آتیٹی مریرہ۔ داخیال آتا درشانی ءِ او چارشنبےنادے آ داڑے آئی پی سی نا جہانی روڈ سیفٹی کانفرنس آن تران کرسا کرے۔ چیئرمین سینیٹ پارے کہ او روڈ سیفٹی نا بابت اہم ترین کانفرنس اٹی بشخ ہلنگ کن دنیا نا چندی بشخ آتیان تعلق تخوک آ غٹ شرفمند آ پارلیمنٹ نا باسک و مہمان تا است انا حب اٹ منت واری ءِ ہرفک، سینیٹ و حکومت پاکستان دانا سفر اٹی مثبت و تعمیری کڑد ادا کریر و ہرممکن کمک کریر۔ اوترکیہ و شام اٹی بھسکار زمی جمب نا سوب آن مروک آ جانی و مالی نسخان تیا ہڑزخواہی و ہمدردی نا درشانی ءِ کرسا پارے کہ مشکل وخت اٹی ترکی و شام انا ایلم ملک آتون سلوک اُن۔ چیئرمین سینیٹ آئی پی سی نا سیکرٹری جنرل سینیٹر ستارہ ایاز ءِ دا دود انا سرسہب اڈتننگ آ مبارکبادی پیش کرے۔ صادق سنجرانی پارے کہ آئی پی سی تینا مسخت آتا دوئی کننگ کن گچین وڑاٹ کاریم کننگ اٹی ءِ، دانا مشن نا اسہ اہم ءُ پلو اس جھیڑہ غاتا ایسری ہم ارے، ہراڑے مچ آ دنیا نا پارلیمنٹ نا باسک آک دا پلیٹ فارم ءِ کاریم اٹ اتسا امن کن پبی کمک کننگ کیرہ۔ اوپارے کہ آئی پی سی جہانی راہشون تے اسہ پلیٹ فارم اس فراوان کیک تانکہ او اہم باندات آتیا تینا خصوصی سلاہ و تفہیم نا شریداری ءِ کیر۔ چیئرمین سینیٹ غٹ اسٹیک ہولڈر ، خاص وڑاٹ جی آئی زیڈ انٹرنیشنل سروسز، سوگو پارلیمان، و پاکستان انسٹی ٹیوٹ فار پارلیمانی سروسز و آئی پی سی ٹیم و دا فورم نا باسک آتا آئی پی سی نا وژن و مشن آ پت کننگ آ منت واری ءِ ہرفے۔ چیئرمین سینیٹ خاص وڑاٹ آئی پی سی نا ساڑی آنائب صدور، آذربائیجان  نا قومی اسمبلی نا چیئرپرسن صاحبہ غفار و ا و جبوتی نا قومی اسمبلی نا صدر ایچ ای محمد علی حمید نا کمکاری و مخ تفی کن اوفتا منت واری ءِ ہرفے۔ اوپارے کہ کنے دا پاننگ تون خوشی مننگ ءِ کہ آئی پی سی نا صدر نا گچین کاریک ہم خڑک ءُ۔ دُن تو ’’روڈ سیفٹی‘‘ نا اصطلاح جانی پہچانی لگک، ولے اودے ہمو چکار و اولیت تننگتو ہرانا او حقدار ءِ۔ چیئرمین سینیٹ پارے کہ سڑک و ٹریفک شکست آک مخلوق ءِ مچ آ زند اکن معذور کننگ کیرہ۔ کم و ود 1.3 ملین بندغ ہرسال سٹرک ٹریفک شکست آتیٹی زوال کیرہ۔ اوپارے کہ اسہ پین کساس اسے نا رداٹ 50 ملین ٹھپی مریرہ۔ اوفتیان نیمہ غان زیات پند اٹ ہنوک آ ، سائیکل وموٹرسائیکل سوار آک اوار ءُ۔ 90 درسد آن زیات مرک کم آن نیامی کٹیا والاملک آتیٹی مریک۔ روڈ سیفٹی آن تعلقدار ایس ڈی جی ہدف آتے دوئی کننگ کن  اواری اٹ کاریم کننگے۔ چیئرمین سینیٹ پارے کہ ٹرانسپورٹ ، جان جوڑی، تعلیم و ایلو بشخ آتے اجتماعی کوشست آتا کمک اٹ گچین کروئی مریک۔ روڈ سیفٹی نا چرجوئی ٹی، آئی پی سی کون آ فورم آک  یقینی وڑاٹ ننا کمک ءِ کننگ کیرہ۔