سائنس و ٹیکنالوجی ٹی کمکاری پاکستان وچین نا ہڑتوم آ کنڈآتا تعلقداری تا اسہ اہم ءُ بشخ اسے، چینی ناظم الامور پانگ چنکسو نا دود آن تران

اسلام آباد۔ 08 فروری (اے پی پی) پاکستان اٹی چین نا ناظم الامور پانگ چنکسو پارینے کہ سائنس و ٹیکنالوجی ٹی کمکاری پاکستان و چین نا ہڑتوم آ کنڈآتا تعلقداری تا اسہ اہم ءُ بشخ اسے، ہڑتوم آ ملک آک اسیجائی وڑاٹ 475 آن زیات پٹ وپولی ڈٹ آتے فنڈ فراوان کرینو  ہرافتے ٹی کشت وکشار ، ایرواسپیس، و کیمیائی صنعت ہم اوار ءِ۔ داخیال آتا درشانی ءِ او چارشنبے نادے آ داڑے چین پاکستان خلائی سائنس و ٹیکنالوجی کمکاری نا بابت اڈ ہلوک دود آن تران کرسا کرے۔ اوپارے کہ 1976 اٹی ہڑتوم آ ملک آتا نیام اٹ بین الحکومتی سائنس و ٹیکنالوجی کمکاری نا معاہدہ غا دستخط آن پد شاندار نتیجہ دوئی مسنے، ہڑتوم آ ملک آتا نیام اٹ آبی وسیلہ غاتا رکھ ، طبی و جان جوڑی نا خیالداری ، بائیو ٹیکنالوجی، کمپیوٹرسائنس، چاگڑد، توانائی ، موسمیات، ارضیات و ٹیکنالوجی نا بست وبند انا بشخ آتیٹی ہم بھاز انگا ڈٹ آتا مالی کمکاری ءِ کننگانے۔  چین نا ناظم الامور پارے کہ اینو داڑے نن چین نا خلائی اسٹیشن اٹی شش تُو آن پد پاکستانی ادویاتی نیال آتا بج آتے حوالہ کننگ نا دود اکن بسنے، شینزو تھا  و تدوک آ دسمبر اٹی بحفاظت ڈغار آ پدی بس، دا اولیکو موقع ءِ کہ ہراتم پاکستانی نیال ءِ خلا غا گدریفنگا، دا آزموندہ یقینی وڑاٹ چین پاکستان سنگتی نا تاریخ و سائنس و ٹیکنالوجی نا کمکاری نا تاریخ اٹ نوشتہ کننگک۔ اوپارے کہ ہڑتوم آ کنڈآتا سائنس و ٹیکنالوجی کمکاری ءِ ہم چین پاکستان اقتصادی راہداری نا فریم ورک انا رداٹ اوار کننگانے، ہرا یقینا سی پیک نا بڑزکوآب و پائیدار شونداری ءِ سوگو کمک فراوان کیک۔ چین نا ناظم الامور پانگ چنکسو اسیجائی کوشست آتیا ہڑتوم آ ملک آتا سائنس دان تا منت واری ءِ ہم ہرفے۔ اووزارت سائنس و ٹیکنالوجی، کامسٹیک و پاکستان سائنس فاؤنڈیشن نا عہدیدار و کامسٹیک نا باسک ملک آتا سفیر و نمائندہ غاتے دا خصوصی موقع غا مشاہدہ کننگ کن دود اٹی بشخ ہلنگ آ اوفتا منت واری ءِ ہرفے۔ ناظم الامور پارے کہ مسہ تُو مست بیجنگ اٹی وزیراعظم محمد شہباز شریف تون اوڑدہی ٹی چینی صدر شی جن پنگ دا ہیت انا درشانی ءِ کریسس کہ چین تینا شونداری حکمت عملی و پاکستان نا نیام اٹ ہم گرنچی ءِ پین ودفک۔ اوپارے کہ دا ہڑتوم آ ملک آتا راہشون تا نیام اٹ طے مروک آ امنائی سلاہ ءِ عملی دروشم اس تننگ نا اسہ پین پیدوار ءُ درور اسے۔ اوپارے کہ ہڑتوم آ ملک آک پوسکن آ دور اٹی اسیجائی آخبت تون اسہ خڑکی چین پاکستان کمیونٹی نا جوڑ کننگ کن سنبرینگوک ءُ۔