اسلام آباد۔ 07 فروری (اے پی پی) چیئرمین سینیٹ محمد صادق سنجرانی تون بین الپارلیمانی یونین نا صدر دوآرتے پاشیکو پارلیمنٹ ہاؤس اٹی اوڑدہی کرے۔ سینیٹ سیکرٹریٹ آن جاری بیان نا رداٹ اوڑدہی ٹی بین الپارلیمانی یونین ءِ پین متحرک کننگ و ادارہ جاتی کمکاری ءِ ودفنگ آ گپ وتران کننگا۔ آئی پی یو نا صدر انٹرنیشنل پارلیمنٹرینز کانگریس نا روڈ سیفٹی نا بابت 8 فروری آن بناکروک آ اِرادے ئی کانفرنس اٹی بشخ ہلنگ کن پاکستان نا دورہ غاٹی ءِ۔ اوآئی پی سی نا دا گام ءِ بھاز اہم گوندا و پارے کہ روڈ سیفٹی پوسکن آ دور اٹی بھاز اہم ءِ۔ چیئرمین سینیٹ پارے کہ پاکستان داوخت آ علاقائی کہول آ رابطہ کاری ءِ ودفنگ و ڈغاری کسر تا کمک اٹ کاروباری و زرگزرانی ات و در آ زور شاغنگ ءِ۔ روڈ سیفٹی اسہ جہانی ءُ ویل اسے و داڑکن غٹ ءِ اواری اٹ کاریم کروئی مریک۔ اوپارے کہ آئی پی سی دا سرحال نا اہمیت ءِ محسوس کرسا فیصلہ کرے کہ جہانی سیاسی سرکڑدہ و چاہندارآتا آزموندہ غاتیان ہم فائدہ ہرفنگے و اسیجائی لائحہ عمل نا کمک اٹ حکمت عملی اس تیار و سلاہ و سوج مرتب کننگے۔ چیئرمین سینیٹ محمد صادق سنجرانی پارے کہ پاکستان آئی پی یو نامشن نا رداٹ امن ، جمہوریت ، انسانی حق ، صنفی بریبری و پائیدار شونداری نا مون آ دننگ کن سنبرینگوک ءِ۔ اوپارے کہ جہانی کہول آ ہراچیلنج آتا مون تروک ءِ اوفتے ٹی روڈ سیفٹی ہم خاص اہمیت اختیار کرسا ہِننگ ءِ۔ روڈ سیفٹی جم شونداری عمل اٹ بھاز اہمیت تخک و ویل جہانی وڑانا ءِ۔ چیئرمین سینیٹ پارے کہ پارلیمنٹرینز الس ءِ آگاہی تننگ کیک۔ چیئرمین سینیٹ مہمان ءِ سینیٹ نا آئینی و کانودی کڑد، گچین کاری تا وڑوڈول و اہمیت نا بارواٹ معلومدار کرے۔ اوڑدہی ٹی سینیٹر مہمانداری سینیٹر فیصل سلیم رحمان، سیکرٹری سینیٹ قاسم صمد خان و بڑزکو کمامدارآک ہم ساڑی ئسر۔ چیئرمین سینیٹ پارے کہ آئی پی یو اسہ بے مٹ ءُ پلیٹ فارم اسے۔ بین الپارلیمانی کمکاری، قومی و علاقائی شونداری کن اہم کڑد ادا کننگ کیک۔ اوپارے کہ پاکستان ءِ IPUکون آ تنظیم آ پورو پت ءِ و دانا کمک اٹ سوگو بین الپارلیمانی کمکاری، شونداری نا وارخواہی ودی کننگ نا سوب جوڑ مننگ کیک۔ پاکستان السی خیرخواہی نا خاطر پائیدار شونداری نا عزم تخک و ہندا مسخت کن کوشست کننگ ءِ۔ چیئرمین سینیٹ محمد صادق سنجرانی پارے کہ آئی پی یو نا فورم آن جھیڑہ غاتا پرامن ایسری نا کنڈا ودفنگ مریک و بھارت ناغیر کانودی کوزہ گیری ٹی جموں وکشمیر و فلسطین اٹی انسانی حق انا خلاف ورزی چکار نا خواہندار ءُ و کنے یقین ءِ کہ نی صدر آئی پی یو نا حیثیت اٹ کشمیر نا ویل ءِ اقوام متحدہ نا قرارداد آتا رداٹ ایسر کننگ و جہانی امن ءِ مون آ دننگ ٹ تینا جوان کڑد ءِ اداکیسہ۔ اوپارے کہ کنے اومیت ءِ کہ دا دورہ ہڑتوم آ ادارہ جاتی تعلقداری تے مون آ دننگ اٹ ہم کمکار مریک و سہی کنڈامون آ دننگ کن رنگ، مذہب، جغرافیہ یا معاشیات نا پرخ ءِ چٹفوئی مریک۔ صدر آئی پی یو تینا دورہ پاکستان ءِ بھاز اہم گوندا و پارے کہ پاکستان نا آئی پی یو ٹی کڑد انا معترف ءِ۔
