کوئٹہ۔ 07 فروری (اے پی پی) وزیراعلیٰ بلوچستان میر عبدالقدوس بزنجو نا کماشی ٹی زید النہیان انسٹیٹیوٹ آف کارڈیالوجی نا بورڈآف گورنرز نا دیوان اڈہلک۔ میر عبدالقدوس بزنجو ہراکہ شیخ محمد بن زید النہیان انسٹیٹیوٹ آف کارڈیالوجی نا چیئرمین بورڈ آف گورنرز ہم ارے نا کماشی ٹی دیوان اٹی ادارہ نا انتظامی ، مالی و ایلو تعلقدار امور تا جاچ ءِ ہلنگا۔ دیوان اٹی چیف سیکرٹری بلوچستان عبدالعزیز عقیلی، چیف ایگزیکٹیو آفیسر شیخ محمد بن زید النہیان انسٹیٹیوٹ آف کارڈیالوجی میجر جنرل طفیل احمد جی او سی 41 ڈویژن میجر جنرل کاشف وزیراعلیٰ نا پرنسپل سیکرٹری عمران گچکی سیکرٹری جان جوڑی صالح محمد ناصر، سیکرٹری ایس اینڈ جی اے ڈی بابرخان، سیکرٹری خزانہ قمبر دشتی، سیکرٹری کانود عبدالصبور کاکڑ، شعبہ امراض قلب نا سروک ڈاکٹر فضل الرحمان تون اوار ایلو تعلقدار کمامدارآک بشخ ہلکر۔ دیوان ءِ سیکرٹری جان جوڑی و ادارہ نا چیف ایگزیکٹیو آفیسر ایجنڈا پوائنٹ آتیا حوال تسر وادارہ کن مالی سال 2022-23کن 911.40ملین روپئی نا سپلیمنٹری گرانٹ نا منظوری ءِ تننگا وخت اس کہ ادارہ نا بابت ایکٹ ءِ اسمبلی ٹی پیش کننگ نا فیصلہ کننگا۔ دیوان اٹی ادارہ کن سلاہ ئی 748 آسامی تا نومین کلیچر، بورڈ آف گورنرنا اول سرآن ٹہیفنگ ایگزیکٹیو کمیٹی نا بناوٹ کانٹریکٹ آ تعینات ڈاکٹر آتے ان ہاؤس پریکٹس نا موکل، ڈیپوٹیشن نا بنداو آ ڈاکٹر و اسٹاف نرس آتا ٹرانسفر پوسٹنگ و اسپیشلائزڈ کیڈر نا ڈاکٹر آتے خصوصی الاؤنس تننگ نا جاچ ءِ ہلنگ تون اوار ایلو تعلقدار فیصلہ غاتا منظوری ءِ تننگا۔ دیوان آن تران کرسا وزیراعلیٰ پارے کہ صوبائی حکومت شعبہ جان جوڑی ءِ اولیت آتیٹی سرفہرست تخانے، شیخ محمد بن زید النہیان انسٹیٹیوٹ آف کارڈیالوجی اسہ بھلو ڈٹ اسے ہرادے پین گچین کننگ نا گرج ءِ، ننے صوبہ نا ایلو ہسپتال آتے ہم ہند اادارہ نا وڑآ گچین کننگ ءِ، وزیراعلیٰ پارت کرے کہ ادارہ نا بابت ہمو امور ہرا المی و دمدستی وڑنا مریر اوفتے بذریعہ سمری وزیراعلیٰ سیکرٹریٹ ارسال کننگے تانکہ وخت زیان مف۔ اوپارے کہ دا ادارہ مفت طبی آسراتی تا فراوانی کن اسہ مثالی ءُ ادارہ اسے، ہراالس ءِ جوان وڑاٹ امراض قلب نا طبی آسراتی فراوان کننگ ءِ، ہندن ءُ فیصلہ ہلنگے ہرا ادارہ نا گچینی نا سوب جوڑ مریر۔
