لاہور۔ 07 فروری (اے پی پی) مسلم لیگ ن نا مرکزی راہشون و بنجائی وزیر ریلوائی خواجہ سعد رفیق پارینے کہ کنا جند انا سلاہءِ کہ مچ آ ملک اٹی لس گچین کاریک مریر، جتا جتا صوبائی وقومی گچین کاری تا اڈتننگ مناسب لگپک، داوخت آ ملک جتا جتا گچین کاری تے سگنگ کپک۔ سے شنبےنادے آلاہور اٹی احتساب عدالت نا پیشن میڈیا تون گپ وتران کرسا بنجائی وزیر ریلوائی پارے کہ نن الیکشن آن نرنگ خواپنہ، بدترین حالیت آتیٹی ہم گچین کاری تیٹی بشخ ہلکونن، و پی ڈی ایم نا اسہ ہم جماعت اس گچین کاری تیان نرپک، مخصوص حالیت آتیٹی مہالو ہم کیہی وار داوڑ مسنے کہ گچین کاریک مون آ ہنانو، گودی بینظیر بھٹو نا شہیدی نا وخت آ ہم گچین کاری تا تاریخ ءِ بدل کننگاسس۔ خواجہ سعد رفیق پارے کہ تعجب ءِ کہ مہالو بیدس سوب آن عمران خان اسمبلی تے پرغا داسہ پاننگ ءِ کہ گچین کاری کرفبو، گچین کاری گوازی اس اف، ملک مہالو آن زرگزرانی تنکی نا گواچی ءِ، زرگزرانی تنکی ہم نوکاپ آنبار ءِ ہرا مچ آ ملک ءِ پلویڑ اٹی ہلکنے۔ ملک اٹی ساڑی آ دہشت گردی نا واقعہ غاتا ذکر ءِ کرسا خواجہ سعد رفیق پارے کہ دہشت گردی نا برخلاف جنگ اٹی مچ آ قوم یکجا مرے، پی ٹی آئی اے پی سی ٹی بایدے بشخ ہلے ، پی ٹی آئی سنجیدگی نا درشانی ءِ کے، دہشت گردی نا برخلاف اسہ پالیسی آ غٹ یکجا مریر، ہندا ٹی ملک و قوم انا گچینی ءِ، ملک ارے تو کل گڑاارے۔
