چاغی۔ 07 فروری (اے پی پی) سیکرٹری لوکل گورنمنٹ بلوچستان نا خصوصی پارت آ چاغی نا شار تفتان اٹی سفائی مہم نا بناءِ کننگا ہرااسہ ہفتہ اسکان برجاسلک۔ چیف آفیسر تفتان حافظ منیر احمد کرد ہندی صحافی تتون گپ وتران کرسا پارے کہ تفتان بازار و ہنکینی گلی تا چندی جاگہ غاتیٹی کچرہ غاتا سفائی نا مہم نا بناءِ کننگانے، تفتان اِرا ملک آتا سیمی شار ءِ داکان انٹرنیشنل مخلوق آک گدرینگرہ ہنداخاطران المی ءِ کہ دا شار مخلوق نا چکار نا جاگہ جوڑ مرے سفائی ستھرائی نا کاریم نا چاروکی ءِ ایس ڈی او میونسپل کمیٹی نور احمد کننگ اٹی ءِ سفائی مہم اسہ ہفتہ اسکان برجاسلک، داوخت آ چیف آفیسر تفتان حافظ منیر احمد کرد نا پاننگ ئس کہ الس ہم تینا اُراتا کچرہ غاتے اسہ خاص ءُ جاگہ سے آ خسے تانکہ اوفتے ہرفنگ اٹ آسانی مرے و وخت ہم زیان مف ، السی حلقہ غاک چیف آفیسر تفتان حافظ منیر احمد کرد نا کارکڑد نا ستاءِ کرسا اوڑکن نیک است خواہی نا درشانی ءِ کرینو کہ خواجہ علاقہ نا الس تون ہروخت کمک کننگ اٹی ءِ و اوفتا غاو آ دمدستی وڑاٹ ایکشن ہلنگک۔
