اسلام آباد۔ 06 فروری (اے پی پی) صدر مملکت ڈاکٹر عارف علوی ترکیہ و شام اٹی زمی جمب اٹی قیمتی جون تا زیان آ ڈکھیائی و است ہسونی نا درشانی ءِ کرینے۔ ایوان صدر نا پریس ونگ انا کنڈان دوشنبےنادے آ جاری ہڑزخواہی بیان اٹی صدر مملکت ترکیہ و شام انا زمی جمب اٹی زوال کروک آ بندغ آتا خاہوت، ترکیہ و شام انا الس و حکومت تون ہڑزخواہی کرینے۔ اوپارے کہ ڈکھیائی نا داساہت اٹی پاکستانی الس و کنا ہمدردیک ترکیہ و شام اتون ءُ۔ صدر مملکت دعا کرے کہ اللہ تعالیٰ زوال کروک آ بندغ آتا وارث آتے صبر وجمیل وایماندار تے سکون نصیب کے۔ صدر ڈاکٹر عارف علوی ہڑتوم آ ملک آتیٹی زمی جمب آن ٹھپی مروک آتا زوت دراخ جوڑی کن دعا ہم کرے۔
