اسلام آباد۔5فروری (اے پی پی): مزن وزیر محمد شہباز شریف ءَ گوشتگ کہ پاکستانی وتی کشمیری برات آناں آزاتی ءِ جہد ءُ کوشست ءَ آئی گوما ھمگام ءَ اوشت ائیت، ھمک میاں اوستمانی فورم ءِ سر ءَ کشمیری آنی سر ءَ بھارت ءِ نیمگ ءَ ظلم آناں دگنیا ءِ دیم ءَ سہرا کتگ۔ مارا راجی سیت آنی واستہ سیاسی یک ءُ دگر ءُ گوں جتا بوھگ ءَ را بے ھیال کنگ لوٹ ایت۔ مزن وزیر کارگس ءِ میڈیا کارگس ءِ پریس ونگ ءِ رد ءَ مزن وزیر محمد شہبازشریف ءَ اے ھیالانی درشانی یک شمبے ءِ روچ ءَ یوم یکوئی کشمیر ءِ موہ ءَ مظفر آباد ءَ کل جماعتی حریت کانفرنس ءِ ڈل ءَ گوں گند ءُ نند ءِ ساھت ءَ کت۔ آئی ءَ گوشت کہ پاکستان ءِ زھگ زھگ کشمیری آنی آزاتی ءِ جہد ءُ کوشست ءَ آوانی گوما انت، اگاں ما ھمے رنگ ءَ راجی ایشوز آنی سر ءَ یک مشت بہ باں گڈا کشمیر ءِ آزاتی گستا نہ انت۔ کل جماعتی حریت کانفرنس ءِ سروک آں مزن وزیر پاکستان محمد شہباز شریف ءِ 5 فروری یوم یکجہتی کشمیر ءِ سر ءَ کشمیری آنی نیام ءَ ساڑی بوھگ ءَ را کشمیر کاز ءِ واستہ باز وشیں گپ ءِ نامینت۔ ءُ مزن وزیر ءَ را گوں دل ءِ جھلانک ءَ وش اتک گوشاں۔ گند ءُ نند ءَ اسپکیر آزات کشمیر کانود جوڑ کنوکیں اسمبلی چوہدری انوار الحق ، مزن وزیر آزات کشمیر سردار تنویر الیاس، کل جماعتی حریت کانفرنس ءِ سروک محمود احمد ساغر، الطاف حسین وانی، محمد حسین خطیب، سید فیض نقشبندی، سید یوسف نسیم ءُ منظور احمد الیاس ضیاء حسین ءَ بھر زوری کت۔ اے موہ ءَ بنجاھی وزیر خواجہ سعد رفیق ، رانا تنویر حسین، مریم اورنگزیب ، مرتضیٰ جاوید عباسی ءُ مشیر مزن وزیر قمر الزمان کائرہ ھم ساڑی ات۔
