اسلام آباد۔ 04 فروری (اے پی پی) وزیراعظم نا سلاہکار امور کشمیر و گلگت بلتستان قمر زمان کائرہ پارینے کہ 05 فروری آ یوم یکجہتی کشمیر ءِ اڈتننگ نا بابت تیاری تے پورو کننگانے۔ ترجمان وزارت امور کشمیر و گلگت بلتستان نا کنڈان جاری بیان نارداٹ دا وخت آ اندرون وبیرون ملک پاکستانیک تینا کشمیری ایڑھ و ایلم تتون پبی یکجہتی نا درشانی ءِ کیرہ۔ قمرزمان کائرہ پارے کہ کشمیری شہید آتے خراج عقیدت پیش کننگ کن 5 فروری آ مچ آ ملک اٹی سہب انا 10 بجہ ءُ اسہ منٹ آ خاموشی اختیار کننگک۔ اومستی پارے کہ شاہراہ دستور اسلام آباد آ کشمیری الس تون یکجہتی کن ریلی اس ہم کشنگک۔ قمر زمان کائرہ پارے کہ یوم یکجہتی کشمیر نا وخت آ وزیراعظم شہباز شریف مظفرآباد آ کاہک وآزاد کشمیر کانود ساز اسمبلی آن تران کیک۔ داوخت آ صدر و وزیراعظم پاکستان نا کنڈان یوم یکجہتی کشمیر نا بابت خصوصی کلہو ہم نشر کننگک۔ قمر زمان کائرہ پارے کہ 05 فروری نا رداٹ بیرون ملک جوڑ پاکستانی مشنز خصوصی ریلیز ، سیمینار و عکسی نمائش اڈتننگ انگ ءِ۔ اوپارے کہ اسلام آباد اٹی پی این سی اے و لوک ورثہ ٹی مسہ دے ئی دود برجاءِ ہرافتے ٹی کشمیری دودوربیدگ ءِ تالان کننگ انگ ءِ۔ اوپارے کہ پرنٹ و الیکٹرانک میڈیاآن بیدس سوشل میڈیا غا ہم کشمیری تتون پبی یکجہتی نا درشانی ءِ کننگک۔ قمرزمان کائرہ پارے کہ دادے انا رداٹ ڈاکیومینٹری و عکس آتا پبی وڑاٹ تشہیر کننگک۔ سلاہکار امور کشمیر و گلگت بلتستان پارے کہ یوم یکجہتی کشمیر نا بابت وزارت حوالکاری و شینکاری، پی ٹی وی، اے جے کے ٹی وی ورلڈ و ریڈیو نا کمک اٹ چندی پروگرام تے نشر کننگک۔ اوپارے کہ پرائیویٹ میڈیا چینل و ایف ایم ریڈیو تیان ہم یوم یکجہتی کشمیر ءِ پبی کوریج ایتنہ۔ قمرزمان کائرہ پارے کہ سول ایوی ایشن، پاکستان ریلوائی، میٹروبس و این ایچ اے بالی پٹ، ریلوائی اسٹیشن ، میٹرو بس اسٹیشن و ٹول پلازہ غاتیا یوم یکجہتی کشمیر نا بابت بینرخلنگانے۔ اوپارے کہ سی ڈی اے ہم اسلام آباد نا غٹ اہم شاہراہ تیا یوم یکجہتی کشمیر نا بابت بینر خلکنے۔ قمر زمان کائرہ پارے کہ داوخت آ سیلولر/موبائل کمپنیک یوم یکجہتی کشمیر نا بابت خصوصی کلہو نشر کیرہ۔ اوپارے کہ داکان بیدس غٹ شار تا بھلا پلازہ، شاپنگ مال و مارکیٹ آتیٹی ہم یوم یکجہتی کشمیر نا بابت سٹیمر و بینر خلنگ نا بست و بند کننگانے۔
