اسلام آباد۔ 04 فروری (اے پی پی) چیئرمین سینیٹ محمد صادق سنجرانی پارینے کہ بھارتی حکومت مقبوضہ کشمیر نا خصوصی حیثیت ءِ چٹفسا مقبوضہ جموں و کشمیر اٹی انسانی حق انا لتاڑتا بدترین ءُ درور اس قائم کرینے۔ یوم یکجہتی کشمیر نا بابت تینا کلہو اٹی اوپارے کہ کشمیر اٹی ودوک آ بھارتی بربریت، ظلم و ستم و انسانی حق انا بدترین لتاڑ بھارت نا مکروہ دروشم ءِ مچ آ دنیا ٹی پاش کرینے، داسہ وخت بسنے کہ انسانی حق انا علمبردار ملک آک، ادارہ غاک و تنظیمک کشمیر نا ویل ءِ اقوام متحدہ نا قرارداد آتا رداٹ ایسر کرفنگ کن گام گیج کیر۔ اوپارے کہ کشمیر پاکستان نا شہ رگ ءِ و پاکستان نا غٹ سیاسی جماعت آک دا ویل انا پرامن ایسری کن گام گیج کرینو۔ کشمیر نا ویل ءِ انصاف اٹ ایسر کننگ کن ملکی و جہانی کہول آ اواری اٹ پین گام گیج کننگ نا گرج ءِ ۔ اوپارے کہ پاکستان نا الس و ادارہ غاک کشمیری تا جہد آجوئی ٹی نئے بیرہ کودک کشمیری تا پبی مخ تفی ءِ کیرہ بلکن اوفتا آجوئی نا دوئی کننگ اسکان ہروڑنا قربانی ایترہ۔ یوم یکجہتی کشمیر نا بابت تینا کلہو اٹی ڈپٹی چیئرمین سینیٹ مرزا محمد آفریدی پارے کہ 5 فروری نادے  کشمیری تا کنڈان آجوئی نا دوئی کننگ کن تروک آ قربانی تیکن یکجہتی نا درشانی نا دے  ءِ ہرادے مچ آ ملک اٹی رہینگوک آ غٹ پاکستانی و کشمیریک پبی جوزہ اٹ اڈایترہ۔ اوپارے کہ کشمیر نا ویل انا بابت پاکستان نا غٹ سیاسی جماعت آک، ادارہ غاک و مچ آ قوم یک زبان ءُ۔ کشمیر نا ویل انا ایسری اقوام متحدہ نا قرارداد آتا رداٹ ہی مریک۔