اسلام آباد۔ 04 فروری (اے پی پی) کشمیری حریت راہشون یاسین ملک نا مسڑ رضیہ سلطانہ پارینے کہ او مودی آن خلیپک، مودی و بھارت اونا باوہ یاسین ملک آن خوفزدہ ءُ، ہرانا سوب آن اودے بندی کننگانے۔ ہفتہ نادے آ ریڈیو پاکستان تون اسہ خصوصی ءُ پوڈ کاسٹ اسے ٹی اوبھارت نا غیرکانودی کوزہ ٹی جموں وکشمیر اٹی کودک چناتیا بھارتی فوج انا ظلم و بربریت آ بھاز غم و غصہ نا درشانی ءِ کرسا پارینے کہ کشمیری چناتے بنداوی تعلیمی حق آن محروم تخنگ انگ ءِ و کشمیری چنا واوفتا لمہ و باوہ غاتا برخلاف پلیٹ گن آتے کاریم اٹ اتنگ انگ ءِ۔ اوپارے کہ کشمیری چناتا رکھ و اوفتے اسکول آ گدریفنگ اونا زند انا مشن ءِ و دا مسخت کن او پاکستانی چناتیان کمک نا خواست ہم کرے۔ رضیہ سلطانہ نرزوری اٹ ہکل ترسا پارے کہ او مودی آن خلیپک، مودی و بھارت اونا باوہ یاسین ملک آن خوفزدہ ءُ ہرانا سوب آن اودے بندی کننگانے۔ اوپارے کہ مقبوضہ جموں وکشمیر نا زندان تیٹی بند بے گناہ کشمیریک ہچ ءُ جرم اس کتنو و اوفتا حق خودارادیت کن جہد پرامن ءِ۔ اوپارے کہ بے گناہ مسلمان تا کسفنگ ناقابل معافی ڈوہ اسے و دابایدے چٹے۔ رضیہ سلطانہ اقوام متحدہ تون اوار جہانی برادری آزور شاغا کہ او کشمیری الس ءِ مودی نا ظالمانہ دُوآن آجو کرفےہرا کشمیر ءِ منی انڈیا ٹی بدل کننگ خواہک۔ اوپارے کہ کشمیری تے حق خودارادیت تننگے۔ اوتینا دا پکا یخین نا درشانی ءِ کرے کہ کشمیری الس بھاز زوت بھارت نا غیرکانودی کوزہ آن آجوئی دوئی کیرہ۔ حریت راہشون نا مسڑ پاکستان نا کنڈان مظلوم کشمیری تا مخ تفی نا ستاءِ کرسا پارے کہ پاکستان مدام کودک مخلوق نا سلوک ءِ و کشمیر پاکستان نا بشخ ضرور جوڑ مریک۔ دہ سال انا رضیہ سلطانہ چنکی نا یات آتے و تینا باوہ تون گدریفوک ا وخت ءِ یات کرسا پارے کہ او تینا باوہ یاسین ملک ءِ بھاز یات کیک و دا پت انا درشانی ءِ کرے کہ اوزوت پدی بریک۔ اوپارے کہ چار سال گدرینگانے ہراتم او آخیریکو وار تینا باوہ تون ٹیل فون آ ہیت کریسس۔ رضیہ سلطانہ بانی بابا قائد اعظم محمد علی جناح ءِ ہم شاندار خراج عقیدت پیش کرسا پارے کہ او ننکن رول ماڈل اسے ہرا تینا مچ آ زند ءِ پاکستان نا خاطر صرف کرے۔