اسلام آباد۔ 04 فروری (اے پی پی) آسٹریلیا ٹی پاکستان نا ہائی کمشنر زاہد حفیظ چوہدری جہانی برادری آن خواست کرینے کہ او کشمیری تا حق خودارادیت کن بھارت آ زور شاغے ہرانا حق اقوام متحدہ نا سلامتی کونسل نا قرارداد آتیٹی تننگانے۔ اومقبوضہ جموں وکشمیر اٹی فوجی کوزہ نا چٹفنگ آ زور شاغسا کشمیری راہشون تا یلہ کننگ و مقبوضہ دامان اٹی جغرافیائی بدلی تا چٹفنگ نا ہم خواست کرے۔ زاہد حفیظ چوہدری پارے کہ بھارت جعلی مقابلہ غاتیٹی کودک کشمیری تا ایکسٹرا جوڈیشنل قتل، پن انا سرچ آپریشن آتے دمدستی وڑاٹ بند کے و کشمیری الس نا غٹ بنداوی حق ءِ بحال کننگے۔ ہفتہ نادے آ سڈنی آن ملوک آ پریس ریلیز نا رداٹ یوم یکجہتی کشمیر نا بابت پاکستانی قونصلیٹ نا کنڈان اڈ ہلوک سیمینار آن تران کرسا زاہد حفیظ چوہدری کشمیری الس نا روا حق خودارادیت نا جہد نا اقوام متحدہ نا قرارداد آتا رداٹ ایسر ی نا بابت پاکستان نا کنڈان کشمیری تا پورو کمکاری نا عزم انا درشانی ءِ کرے۔ سیمینار اٹی آسٹریلیا نا پارلیمان نا باسک آک، صحافیک، تعلیمی چاہندارآک، انسانی حق انا کارندہ غاک و آسٹریلیا ٹی رہینگوک آ پاکستانی وکشمیری برادریک پبی بشخ ہلکر۔ سیمینار نا نمان ترانکارآتیٹی سینیٹر ڈیوڈ شوبریگ، سینیٹر ڈاکٹر مہرین فاروقی ، مسکوہی سینیٹر و انسانی حق انا کارندہ لی رینان و آسٹریلیا نا اسلامک کونسل فیڈریشن نا صدر ڈاکٹر رطب جنیدئسک ہم اوار ئسر۔ ترانکارآک غیرکانودی بھارتی مقبوضہ جموں وکشمیر اٹی انسانی حق انا بھلا حالیت آتے تالان کرسا اقوام متحدہ نا قراردادو کشمیری الس نا است خواہی تا رداٹ کشمیر نا ویل انا ایسر کننگ نا گرج آ زور شاغار۔ انسانی حق انا حالیت آتابارواٹی سینیٹر ڈیوڈ شوبریگ پارے کہ مقبوضہ کشمیر نا الس نا انسانی حق انا رکھ مچ آ جہانی برادری نا اسیجائی زمواری ءِ۔ اوپارے کہ انسانی حق آ واپاری و سیاسی فائدہ غاتے فوقیت تننگ مفک۔ 5 اگست 2019 نا غیرکانودی بھارتی گام گیج آتا بابت سینیٹر مہرین فاروقی گڑتی نا درشانی ءِ کرے و پارے کہ مقبوضہ دامان اٹی انسانی حق انا حالیت آک بھاز خراب ءُ۔ او جہانی برادری آ زورشاغا کہ او انسانی تنکی آ تینا خاموشی ءِ پرغسا کشمیر نا جھیڑہ نا ایسری کن توار بڑزکے۔ لی رینان غیرکانودی بھارتی مقبوضہ کشمیر اٹی بھارت نا ظلم انا بابت آگہی ٹی ودکی نا گرج آ زور شاغسا پارے کہ کشمیری تا حق خودارادیت کن جہانی کمکاری نا گرج ءِ۔ اوپارے کہ کشمیر آ بھارتی کوزہ مچ آ دنیا ٹی مریس انگا کوعزہ و کشت وخون نا تاریخ ءِ۔ ڈاکٹر رطب جنید جموں کشمیر آ بھارت نا غیرکانودی کوزہ نا مذمت ءِ کرسا پارے کہ کشمیر کالونی ازم انا پوسکن آ دروشم ءِ۔ اوجہانی برادری آ زور شاغا کہ او کشمیری تا حق ارادیت نا سہی جہد اٹی اوفتے تون تفے۔
