اسلام آباد۔ 04 فروری (اے پی پی) جامعہ کشمیر اٹی ہفتہ دود یوم کشمیر نا چرجوئی ٹی شعبہ جہانی تعلقداری و کشمیر انسٹی ٹیوٹ آف انٹرنیشنل ریلیشنز (کے آئی آئی آر) نا کمک اٹ اسہ دے ئی کانفرنس بعنوان’’کثیر القطبی دنیا ٹی کشمیر نا ویل و بھارت نا غیرکانودی کوزہ‘‘ اڈ ہلک۔ جامعہ کشمیر نا شعبہ تعلقات عامہ آن جاری مروک آ پریس ریلیز نا رداٹ دا اسیجائی کانفرنس کشمیر سٹڈیز آڈیٹوریم چہلہ کیمپس اٹی مس، ہراٹی کشمیری راہشون و انسانی حق آ کاریم کروک آ پنی آ کارندہ، چیئرمین کشمیر انسٹیٹیوٹ آف انٹرنیشنل ریلیشنز الطاف حسین وانی، اسسٹنٹ  پروفیسر و رفاہ یونیورسٹی اسلام آباد نا شعبہ جہانی تعلقات نا سروک ڈاکٹر اویس بن وصی، سروک شعبہ جہانی تعلقداری جامعہ کشمیر ڈاکٹرمحمود حسین، کوارڈنیٹر شعبہ جہانی تعلقداری صبا اسرار فیکلٹی باسک عامر حبیب ، مدیحہ شکیل و ایلوفک تران کریر۔ کانفرنس آن تران کرسا چیئرمین کشمیر انسٹیٹوٹ آف انٹرنیشنل ریلیشنز الطاف حسین وانی بشخ ہلوک آتا چکار ءِ 5 اگست 2019 آن پد کشمیر نا منظرنامہ غا کرفسا جموں وکشمیر اٹی انسانی حق انا تازہ حالیت آتیا گپ وتران کرے۔ اوطالب علم آتے جموں وکشمیر اٹی بھارتی فوج و نیم فوجی دستہ غاتا کنڈان انسانی حق انا بھلا خلاف ورزی تیان معلومدار کرسا پارے کہ بزور طاقت کشمیری تا پیدائشی حق خودارادیت ءِ توننگ کن ظلم و استبداد نا پوسکن آ پوسکن چم آتے کاریم اٹ اتنگ ءِ۔