اسلام آباد۔ 04 فروری (اے پی پی) صدر مملکت ڈاکٹر عارف علوی ملک اٹی جان جوڑ و فطرت نا خڑک سرجزآتا مون آ دننگ نا گرج آ زور شاغسا پارینے کہ گولف نا گوازی انسان ءِ فطرت نا خڑک اتیک، وردش و جونی مشقت انسانی جان جوڑی کن بھاز المی ءِ۔ ہفتہ نادے آ ایوان صدر میڈیا ونگ انا کنڈان جاری اعلامیہ نا رداٹ صدر مملکت اسلام آباد اٹی گولف ٹورنامنٹ نا ایسری دود اٹی بشخ ہلک۔ دود اٹی پاکستان بحریہ نا سروک ایڈمرل محمد امجد خان نیازی، سی ای او سیرینا ہوٹلز عزیز بولانی و نرینہ و نیاڑی گولفر آک ہم بشخ ہلکر۔ داوخت آ تران کرسا صدر مملکت پارے کہ فطرت آن خڑک جان جوڑ ءُ عمل اسے ہرا گچین فیصلہ سازی ٹی کمک ایتک۔ اوپارے کہ ملک اٹی گولف کون آ جان جوڑ سرجزآتا مون آ دننگ المی ءِ۔ صدر مملکت داوخت آ گولف ٹورنامنٹ ءِ کٹوک آ و گالف انا چندی بشخ آتیٹی گچین کارکڑد نا درشانی ءِ کروک آ گالفرآتیٹی انعام ہم بشخا۔ عزیز بولانی دود انا بشخ ہلوک آتے پاکستان اٹی گوازی تا مون آدننگ خاص وڑاٹ گالف نا مون آ دننگ کن تینا ہوٹل نا اسپورٹس سفارتکاری نا گام انا بارواٹی معلومدار کرے۔ داکان مست صدر مملکت ڈاکٹر عارف علوی اسلام آباد اٹی سرسہب گولف ٹورنامنٹ کرفنگ آ سرینا ہوٹلز نا اسپورٹس سفارتکاری نا گام انا ہم ستاءِ کرے۔
