گوجرانوالہ۔ 04 فروری (اے پی پی) بنجائی وزیر توانائی انجینئر خرم دستگیر خان پارینے کہ 57 کروڑ روپئی نا خڑچ آن تفنگوک آ 132 کے وی دولت نگر گریڈ اسٹیشن و فیڈنگ ٹرانسمیشن لائن نا تفنگ آن علاقہ ٹی شونداری و شونہالی نا پوسکن ءُ بشخ اس ملنگک، بھلو زر اسے نا زرکاری آن تفنگوک آ دا گریڈ اسٹیشن آن نئے بیرہ اہل علاقہ ءِ گچین وولٹیج اتون آب اٹ بجلی دوئی مریک بلکن گیپکو ءِ لائن لاسزا ٹی کمتی نا سوب آن کروڑ آ روپئی نا بچت ہم مریک۔ داخیال آتا درشانی ءِ او 132کے وی دولت نگر گریڈ اسٹیشن و فیڈنگ ٹرانسمیشن لائن نا پوروی نا بنائی دود آن تران کرسا کرے۔ داوخت آ چیف ایگزیکٹیو گیپکو انجینئر محمد ایوب، چیئرمین بی اوڈی محمد شعیب بٹ، نوابزادہ غضنفر گل و ایلوفک ہم تران کریر۔ بنجائی وزیر پارے کہ گیپکو نا بجلی نا نظام ءِ پورو وڑاٹ اپ گریڈ کننگ نا مشن آ عمل کننگ ءِ و دا چرجوئی ٹی مچ آ ریجن اٹی گریڈ اسٹیشن تا تفنگ و اپ گریڈیشن نا چندی ڈٹ آتیا کاریم بھاز ترندی اٹ برجاءِ۔ اوپارے کہ 132 کے وی دولت نگر گریڈ اسٹیشن نا تفنگ آن مالی فائدہ غاتیان بیدس داڑان علاقہ نا زرگزرانی و راجی حالیت اٹی بھاز گچینی بریک، مخلوق ءِ بجلی نا فراوانی نا نظام سوگو مریک، پوسکن ءُ صنعت ہم جوڑ کننگک، مہالو آن ساڑی صارف آتا کم وولٹیج نا بابت ویل آک ایسر مریرہ و مخلوق ءِ روزگار ملک۔ داوخت آ چیف ایگزیکٹیو انجینئر محمد ایوب حوال ترسا پارے کہ 132 کے وی دولت نگر گریڈ اسٹیشن و فیڈنگ ٹرانسمیشن لائن نا کل خڑچ 57 کروڑ روپئی ءِ ہرافتیان گریڈ اسٹیشن نا خڑچ کم و ود 39 کروڑ روپئی وخت اس کہ فیڈنگ ٹرانسمیشن لائن نا جوڑ کننگ آ 18 کروڑ روپئی خڑچ بسنے۔ اوپارے کہ دا ڈٹ انا جوڑ کننگ آن گیپکو ءِ لائن لاسز اٹی کمتی نا مد اٹی سالانہ 85 لکھ 60 ہزار آن زیات یونٹ آتا بچت مریک، گریڈ اسٹیشن آن 7 پوسکن ءُ فیڈر شیرگرھ، لمبھڑا، ڈوگا، لاہوریاں، عمروالا، بنین و ککرالی کشنگانے ہرافتیان 72 میگاواٹ اسکان نا پوسکن آ کنکشن خلنگ نا گنجائشت ساڑی ءِ۔ چیف ایگزیکٹیو پارے کہ 48 کنال ڈغار تیا تالان دا گریڈ اسٹیشن گیپکو تینا وسیلہ و زرآن کم و ود یک و نیم سال انا گونڈ مد اٹی تفینے ہرا گیپکو نا انجینئر آتا کسبی مہارت نا شاہدی ءِ۔ بنجائی وزیر انجینئر خرم دستگیر خان پارے کہ ملک ءِ ساڑی کرائسز آتیان کشنگ نا پبی کوشست کننگ انگ ءِ، غٹ پاکستانی تے مرے کہ جندی فائدہ غاتے اسہ پلو تخسا ملکی فائدہ ٹی غٹ اسہ جاگہ غا سلر۔ دوداٹی جی ایم ٹیکنیکل مظہر نوید، چیف انجینئرز معظم فضل، شاہد نعیم چیمہ، آصف ندیم، ڈی جی ایچ آر جلیل الرحمن، پی ڈی جی ایس سی فیصل نفیس، ایس ای گجرات چوہدری امین، مینجرز چوہدری اکبر علی، ذیشان ستار، تصدق ایوب، رانا جہانگیر تون اوار گیپکو آفیسر و ملازم آک و ایلو علاقہ نا شرفمندو السی نمائندہ غاتا بھلو کچ اس ساڑی ئسر۔
