پشاور۔ 03 فروری (اے پی پی) وزیراعظم محمد شہباز شریف پارینے کہ دہشت گردی نا پورو چٹفنگ اسکان آسرات تولپنہ، بنجائی حکومت خیبرپختونخوا نا انسداد دہشت گردی ڈیپارٹمنٹ (سی ٹی ڈی) و پولیس ءِ سوگو کننگ کن زیات آن زیات کمک کیک تانکہ دہشت گردی تون گچین وڑاٹ مون تننگ مرے۔ اوداہیت ءِ پشاور نا ساڑی آ دہشت گردی نا واقعہ نا بابت جمعہ نادے آ داڑے ایپیکس کمیٹی نا دیوان اٹی تینا بنائی تران اٹی پارے۔ وزیراعظم پشاور نا دہشت گردی نا واقعہ ٹی زوال کروک آتا خاہوت آتون یکجہتی نا درشانی ءِ کرے و بنجائی حکومت نا کنڈان زوال کروک آ بندغ آتا خاہوت آتیکن 20 لکھ روپئی و ٹھپی تیکن 05 لکھ روپئی معاوضہ نا پڑو کرے۔ اوپارے کہ صوبہ ٹی دہشت گردی نا واقعہ غاتا اسہ تازہ چرجوئی اس مون آ بسنے ہراڑتون مون تننگ کن اونا سیکورٹی محکمہ غاتا کاریم نا کچ ءِ ودفنگ نا گرج ءِ۔ وزیراعظم دہشت گردی نا لعنت تون اواری اٹ جنگ تننگ کن غٹ صوبہ غاتا نیام اٹ سیوت آ زور شاغا۔ اوسانحہ پشاور نا بابت سوشل میڈیا غا جاری مہم نا مذمت ءِ کرسا اوفتے بے بنداو گوندا۔ شہباز شریف دا عزم انا درشانی ءِ کرے کہ دہشت گردی نا واقعہ نا پورو جاست وپاست ءِ کننگک و زموار آتے اوفتے اوفتا کروک نا سزا تننگک۔ اوپارے کہ منہ سال مست دہشت گردی نا مون ءِ توننگاسس ، قوم سوج کننگ ءِ کہ دہششت گردی دُوارہ انت اکن کاٹم ہرفنگ ءِ؟ اوپارے کہ مچ آ پاکستانی قوم دہشت گردی نا برخلاف جنگ اٹی یکجا ءُ، وخت انا گرج ءِ کہ سیاسی، مذہبی راہشون و قومی ادارہ غاک دہشت گردی نا برخلاف یکجا مریر، دہشت گردی نا پورو چٹفنگ اسکان آسرات تولپنہ۔ وزیراعظم پارے کہ مستین اٹی ضرب عضب و ردالفساد کون آ آپریشن تیٹی عظیم قربانی تننگا، پاکستان نا فوج دلیری و نرزوری اٹ دہشت گردی نا مقابلہ ءِ کرے و دہشت گردی نا برخلاف جنگ اٹی بےپناہ قربانی تس، قوم اوفتا قربانی تے روشنا حرف آتیٹی یات تخک۔ اوپارے کہ ہر اسٹ ءِ تینا زمواری نا بارواٹی ہیت کروئی مریک، این ایف سی ایوارڈ نا رداٹ دہشت گردی نا چٹفنگ کن تدوک آ 13 سال اٹی خیبرپختونخوا ءِ 417 ارب روپئی تننگا، دافتے ہراڑے خڑچ کننگا، اونا بایدے آڈٹ مرے۔ وزیراعظم پارے کہ بنجانا زمواری ءِ کہ صوبہ غاتے وسیلہ ایتے، ملک داوخت آ زرگزرانی مشکل آتا گواچی ءِ ولے بنجا ہرچار آ صوبہ غاتیٹی سی ٹی ڈی ءِ سوگو کننگ کن گام گیج کیک۔ اوپارے کہ دہشت گردی نا چٹفنگ کن قومی سیوت المی ءِ۔ وخت انا خواست ءِ کہ غٹ مذہبی و سیاسی جماعت آک یکجا مریر۔ وزیراعظم پارے کہ او 7 فروری آ آل پارٹیزکانفرنس (اے پی سی) ءِ بٹنگانے تانکہ ساڑی آ قومی چیلنج آتا مون ءِ توننگ نا وڑوڈول آتیا گپ وتران کننگ مرے، پاکستان تحریک انصاف (پی ٹی آئی ) ءِ کانفرنس اٹی بشخ ہلنگ نا سلہ خلنگانے، داوخت آ دیوان اٹی پشاور نا مسیت اٹی خودکش دھماکہ ٹی زوال کروک آتیکن دعاپاتیا ہم کننگا۔
