اسلام آباد۔ 03 فروری (اے پی پی) وزیراعظم محمد شہباز شریف پارینے کہ پاکستان چین نا اسٹریٹجک تعلقداری ٹی ودکی ہڑتوم آ ملک آتا دہائی تیا تالان دیرینہ سنگتی نا شاہدی اسے ، کراچی ٹی تدوک آ دے کے تھری ڈٹ انا بنا چین پاکستان نا تعلقداری ٹی پین سوگوی نا ڈیک ءِ، کے تھری ڈٹ پاکستان نا مریس مدتی زرگزرانی شونداری ٹی اہم ءُ کڑد اس ادا کیک۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او چائنہ نیشنل نیو کلیئر کارپوریشن نا وائس چیئرمین لیوجینگ و پاکستان اٹی چینی سفارت خانہ نا ناظم المور پنگ چُن شوئی نا کماشی ٹی بروک آ ڈل اتون گپ وتران کرساکرے ہرا جمعہ نا دے آ داڑے اوڑتون اوڑدہی کرے۔ اوڑدہی ٹی بنجائی وزیر خزانہ و محصولات سینیٹر اسحاق ڈار، بنجائی وزیر ڈٹ بندی احسن اقبال ، بنجائی وزیر بجلی انجینئر خرم دستگیر خان ، سلاہکار وزیراعظم احدچیمہ، خصوصی کمکار طارق فاطمی ، طارق باجوہ، جہانزیب خان و تعلقدار بڑزکو کمامدارآک ساڑی ئسر۔ وزیراعظم پارے کہ پاکستان چین نا اسٹریٹجک تعلقداری ٹی ودکی ہڑتوم آ ملک آتا دہائی تیا تالان دیرینہ سنگتی نا شاہدی اسے۔ کراچی ٹی تدوک آ دے کے تھری ڈٹ انا بنا ء چین پاکستان نا تعلقداری ٹی پین سوگوی نا ڈیک ءِ۔ دا پاور پلانٹ نئے بیرہ پاکستان نا ودوک آ بجلی نا گرج آتے پورو کیک بلکن کم خڑچ و چاگڑد دوست بجلی فراوان کیک و پاکستان نا مریس مدتی زرگزرانی شونداری ٹی اہم ءُ کڑد اس ادا کیک۔ اوڑدہی ٹی وزیراعظم ءِ پاننگاکہ چین پاکستان اٹی نیوکلیئر انرجی نا بشخ اٹی زرکاری ءِ ودفنگ اٹ است خواہی تخک و دابابت زوت ڈل آتا کہول آ اوڑدہی تا بناءِ کننگک ہرانا وزیراعظم خیرمقدم ءِ کرے۔
